00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports yasinyishije Luvumbu na Muhire Kevin (Amafoto)

Yanditswe na Eric Tony Ukurikiyimfura
Kuya 24 Mata 2021 saa 02:48
Yasuwe :
0 0

Ku gicamunsi cyo kuri uyu wa Gatandatu tariki ya 24 Mata 2021, Rayon Sports yasinyishije abakinnyi babiri bakina hagati mu kibuga basatira izamu, Héritier Luvumbu Nzinga na Muhire Kevin, bombi ku masezerano y’amezi abiri azarangirana na Shampiyona ya 2020/21.

Kimwe n’andi makipe yose ari mu Cyiciro cya Mbere, Rayon Sports yemerewe kongeramo abakinnyi bashya kugeza tariiki ya 29 Mata 2021.

Kuri uyu wa Gatandatu, ibinyujije kuri Twitter, iyi kipe yatangaje ko yasinyishije Muhire Kevin wakinaga muri Oman, ariko Shampiyona yaho ikaba yarahagaritswe n’icyorezo cya COVID-19.

Muhire Kevin wakiniye Rayon Sports hagati ya 2015 na 2019, yayivuyemo ajya gukina mu Misiri, ahava muri uyu mwaka, yerekeza muri Oman.

Undi mukinnyi Rayon Sports yasinyishije ni Umunye-Congo, Nzinga Héritier Luvumbu w’imyaka 26. Yakinaga muri Maroc, aho yageze muri 2018 agiye muri AS FAR batandukanye muri 2019 akajya muri Youssoufia Berrechid yakiniraga kugeza ubu.

Luvumbu wari kumwe na Repubulika Iharanira Demokarasi ya Congo muri CHAN 2016 mu Rwanda, yakiniye kandi Union SG yo mu Bubiligi na AS Vita Club y’iwabo.

Rayon Sports iri mu itsinda B rya Shampiyona, izatangirira kuri Gasogi United tariki ya 2 Gicurasi, iminsi itatu mbere yo guhura na Kiyovu Sports mu gihe izasoreza kuri Rutsiro FC tariki ya 8 Gicurasi 2021.

Mu kwitegura iyi mikino, imaze gukina umukino umwe wa gicuti, aho yatsinze Bugesera FC ibitego 2-0 ku wa Gatatu mu gihe ishobora gukina na Police FC undi mukino wa gicuti ku Cyumweru cyangwa ku wa Mbere tariki ya 26 Mata 2021.

Héritier Luvumbu Nzinga yifotozanya na Uwayezu Jean Fidèle uyobora Rayon Sports
Komite Nyobozi ya Rayon Sports yifotozanya na Luvumbu nyuma yo gusinya
Héritier Luvumbu yasinye amasezerano y'igihe gito muri Rayon Sports
Muhire Kevin yasinyiye gusubira muri Rayon Sports
Perezida wa Rayon Sports, Uwayezu Jean Fidèle, yifotozanya na Muhire Kevin wahawe nimero 11
Muhire Kevin wakiniraga Saham Club muri Oman, yasinye amezi abiri

Amafoto: Rayon Sports


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .