Rayon Sports yashyize hanze umwambaro mushya izakoresha umwaka utaha w’imikino

Yanditswe na Ishimwe Israel
Kuya 19 Nzeri 2016 saa 08:11
Yasuwe :
0 0

Rayon Sports yamaze kwerekana umwambaro mushya w’amabara y’ubururu n’umweru izakoresha umwaka utaha w’imikino harimo uwo mu rugo igihe yakiriye ndetse n’uwo izajya ikoresha yasohotse hanze.

Iyi kipe yatwaye igikombe cy’Amahoro umwaka ushize, igiye gutangirana shampiyona umwambaro mushya w’amabara y’umweru n’ubururu nk’uko isanzwe yambara ariko noneho mu mwenda wo mu rugo ukaba ari ubururu ufite imirongo y’umweru itambitse imbere mu gihe umwenda wo hanze ari umweru n’imirongo y’ubururu itambitse imbere.

Umunyamabanga w’iyi kipe, Gakwaya Olivier yabwiye IGIHE ko iyi myenda yakozwe hakurikijwe amabara asanzwe aranga iyi kipe ariko by’umwihariko bakaba bashyize hanze uburyo izaba ikoze kugira ngo bareke guha urwaho abiyitirira ko bacuruza imyenda ya Rayon Sports kandi ari imyiganano kandi nta n’uburenganzira babifitiye.

Ati “Uyu niwo mwenda abafana bagomba kumenyera, wenda uko umwaka utangiye tuzajya duhinduraho utuntu duke ariko ni gutyo uzajya uba umeze. Hari abantu biyitiriraga gucuruza imyambaro ya Rayon Sports ariko ubu bigiye gucika kuko n’abafana twabakoreye imyambaro isa n’iy’abakinnyi.”

Rayon Sports iranateganya kongera gukora umuhango wo kwereka abafana abakinnyi izakoresha muri shampiyona baba abashya ndetse n’abasanzwe nk’uko yabikoze umwaka ushize.

Gakwaya avuga ko itariki ibi birori bizaberaho ari nabwo bazatanga nimero kuri buri mukinnyi itaramenyekana bitewe na gahunda zitandukanye bakiri kunoza.

Iyi kipe uretse kuba ishaka kwegukana igikombe cya Shampiyona iheruka muri 2013, izanahagararira igihugu mu marushanwa Nyafurika, Orange CAF Confederation Cup y’uyu mwaka.

Umwambaro Rayon Sports izajya yambara iri mu rugo
Uyu niwo mwambaro Rayon Sports izajya yambara yasohotse
Uyu niwo mwambaro Rayon Sports yambaraga umwaka ushize iyo yabaga yakiriye
Umwambaro Rayon Sports yambaraga umwaka ushize yasohotse hanze
Ibirori byo kwerekana abakinnyi umwaka ushize byari ubudasa

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza