Rayon Sports yahembye ukwezi kumwe, abakinnyi bemera kuva ku izima

Yanditswe na Ishimwe Israel
Kuya 8 Nzeri 2016 saa 01:23
Yasuwe : XX
0

Abakinnyi ba Rayon Sports baraye banze kujya mu mwiherero w’ikipe, aho bagombaga kurara hamwe kugira ngo bakomeze kwitegura irushanwa rya AS Kigali kubera gutinda guhabwa umushahara nk’uko ubuyobozi bwari bwabibasezeranyije.

Ku munsi w’ejo, kuwa Gatatu ubwo iyi kipe y’i Nyanza yari irangije imyitozo, Perezida Gacinya Denis yaganiriye n’abakinnyi bakuriye abandi mu ikipe abasaba ko bakwihangana bakemera kujya mu mwiherero noneho ibibazo by’ibirarane bafitiwe bikaza gukemuka ariko bari kumwe.

Igihe yari yababwiye ko batangira kubona ubutumwa bugufi bwemeza ko amafaranga yabo yageze ku makonti ntibabubonye nabo banga kujya mu mwiherero ndetse babwira ubuyobozi ko batazakina igihe cyose bazaba batarahabwa amafaranga.

Saa mbiri z’ijoro nibwo batangiye kubona amafaranga nk’uko umwe mu bakinnyi ba Rayon Sports yabitangarije IGIHE.

Yagize ati “Nubwo bari batubwiye ko batwishyura amezi abiri, baduhaye kumwe. Saa yine za mu gitondo nibwo twahise tujya mu mwiherero wo kwitegura umukino wa Police FC.”

Umutoza Masoudi Djuma aherutse gutangaza ko azi neza ubuzima Rayon Sports ibamo kuko yanayikiniye akanayibera Kapiteni mu myaka yashize, ari na yo mpamvu kenshi abwira abakinnyi gukora ibishoboka byose bagashimisha abafana kuko ari nzira yonyine ishobora gutuma babona amafaranga ku gihe, yo soko ikipe ikuramo ubushobozi.

Rayon Sports iracakirana na Police FC kuri Stade ya Kigali kuri uyu wa Kane saa kumi n’ebyiri.

Rayon Sports igiye gukina na Police FC itarayitsinda mu mikino ine iheruka harimo uwo yayitsinze 3-1 muri shampiyona y’umwaka ushize n’ubundi kuri stade ya Kigali ku masaha nk’ayo bari bukinireho.

Umukino wa Rayon Sports na Police FC urabanzirizwa n’ufungura irushanwa uri buhuze AS Kigali na AS Vita Club yo muri Repubulika Iharanira Demokarasi ya Congo saa cyenda n’igice.

Perezida Gacinya Denis asaba abakinnyi kwemera gukina irushanwa
Abakinnyi ba Rayon Sports bari banze kujya mu mwiherero batarahembwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza