Rayon Sports yagabanyije umushahara w’abakozi bayo

Yanditswe na Eric Tony Ukurikiyimfura
Kuya 3 Gashyantare 2021 saa 07:38
Yasuwe :
0 0

Ubuyobozi bwa Rayon Sports bwatangaje ko bwaganiriye n’abakinnyi bayo bwemeranya ko bazajya bahembwa 30% by’umushahara muri iki gihe nta mikino iri kuba.

Rayon Sports yemeje ko iri gabanuka ry’umushahara ku bakozi bayo rizatangira kubahirizwa uhereye muri Mutarama 2021.

Iki cyemezo cyafashwe nyuma y’uko Shampiyona y’Icyiciro cya Mbere mu Rwanda yahagaritswe na Minisiteri ya Siporo kuva ku wa 12 Ukuboza 2020 kubera ubwandu bwa COVID-19 bwagaragaye mu makipe amwe.

Aganira na IGIHE, Umuvugizi wa Rayon Sports, Nkurunziza Jean Paul, ntiyeruye ngo avuge ibyo bumvikanye n’abakinnyi [abakozi], ariko yemeza ko bazakomeza kubishyira mu bikorwa.

Ati “Murabizi ko umushahara ari ingurane y’akazi kakozwe, hari ibyo abakinnyi bumvikanye n’ubuyobozi, hari ibyo baganira bikubiye mu masezerano, tubishyira mu bikorwa.”

“Kugeza kuri uyu munota turabyubahiriza. Gusa sindibubijyemo cyane, ibyo twumvikanye, ibyo twaganiriye, bishyirwa mu bikorwa nta kibazo gihari.”

Nkurunziza yavuze ko nubwo kimwe n’andi makipe cyangwa ibigo na Rayon Sports yahuye n’ingaruka z’icyorezo cya COVID-19 ariko izakomeza kubahiriza ibyo yumvikanye n’abakozi.

Uretse Rayon Sports, andi makipe yafashe icyemezo cyo kugabanyiriza imishahara abakinnyi ni Musanze FC, Bugesera FC na Gasogi United mu gihe Mukura Victory Sports, AS Muhanga na Kiyovu Sports zabaye zisubitse amasezerano.

Kuba Rayon Sports yari yarasubitse amasezerano y’abakozi bayo hagati ya Mata na Kanama 2020 ni byo byatumye ifata icyemezo cyo kugabanya umushara, aho kongera kuyasubika kandi Itegeko ry’Umurimo mu Rwanda ribiteganya mu gihe kitarenze iminsi 90 mu mwaka umwe.

Nk’uko bikubiye mu ngingo ivuga ku mushahara, impande zombi zemeranyijwe ko "izajya ivugururwa buri gihe hakurikijwe uko ibintu bizagenda bihinduka."

Rayon Sports izajya ihemba abakozi bayo 30% by'umushahara uhereye muri Mutarama 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .