Rayon Sports mu itsinda rimwe na Gor Mahia muri CECAFA Kagame Cup

Yanditswe na Dusabimana Aimable
Kuya 5 Kamena 2018 saa 01:13
Yasuwe :
0 0

Rayon Sports izaserukira u Rwanda mu mikino ya Cecafa Kagame Cup ihuza amakipe yabaye aya mbere iwayo muri Afurika yo Hagati n’Uburasirazuba, yashyizwe mu itsinda rimwe na Gor Mahia yo muri Kenya.

Biteganyijwe ko imikino ya Cecafa Kagame Cup izabera muri Tanzania uyu mwaka izatangira ku wa 28 Kamena igasozwa ku wa 13 Nyakanga 2018. Iyi mikino izahurirana n’iy’Igikombe cy’Isi kizabera mu Burusiya hagati ya tariki 14 Kamena na 15 Nyakanga 2018.

Rayon Sports izaserukira u Rwanda yashyizwe mu itsinda B ihuriyemo na Gor Mahia, bizahita bicakirana ku wa 1 Nyakanga; Lydia Ludic Académic FC y’i Burundi ndetse na Ports ihagarariye Djibouti.

Tanzania izakira iyi mikino ya Cecafa Kagame Cup ihagarariwe n’amakipe atatu ariyo Azam FC iri mu itsinda A, Yanga na Simba byahuriye mu itsinda rikomeye cyane rya C ririmo na St. George yo muri Ethiopia na Dakadaha yo muri Somalia.

Iyi tombola yabereye muri Tanzania kuri uyu wa Kabiri, yayobowe n’Umunyamabanga Mukuru wa Cecafa, Musonye Nicholas, abayobozi b’Ishyirahamwe ry’Umupira w’Amaguru muri Tanzania (TFF), aba Azam n’abandi.

Musonye yijeje ko iri rushanwa rimaze imyaka 44 rikinwa, kuri iyi nshuro rizaba nubwo hakiri ibibazo bishingiye ku mikoro bituma risubikwa bya hato na hato.

Rayon Sports yisanze mu itsinda rimwe rizakinira i Dar Es Salaam aho iri kumwe na Lydia Ludic Burundi Académic FC (LLB) yasezereye muri CAF Champions League muri Gashyantare 2018 ndetse na Gor Mahia ziheruka guhanganira i Kigali zikanganya 1-1 muri CAF Confederation Cup. Aya makipe yombi agiye kongera guhura mbere y’umukino wo kwishyura utegerejwe ku wa 17 Kanama 2018 muri Kenya.

Mu mikino ya CAF Confederation Cup, Rayon Sports imaze kunganya imikino yombi yakinnye na Gor Mahia mu rugo na Young Africans muri Tanzania, ikaba iri ku mwanya wa gatatu n’amanota abiri inganya na Gor Mahia ya kabiri, naho USM Alger ya mbere ikaba ifite ane mu gihe Young ifite rimwe.

CECAFA Kagame Cup izitabirwa n’amakipe 12 izakinirwa kuri Uwanja wa Taifa na Chamadzi Grounds mu Mujyi wa Dar es Salaam. Amakipe abiri muri buri tsinda, n’abiri yitwaye neza ku myanya ya gatatu ahita akomeza muri 1/4 cy’irangiza.

Igikombe cy’amakipe muri Cecafa cyaherukaga gukinirwa mu 2015, gifitwe na Azam FC yo muri Tanzania yatsinze ku mukino wa nyuma Gor Mahia yo muri Kenya ibitego 2-0 bya John Bocco na Kipré Brice Hermann Tchétché, yagitwaye idatsinzwe igitego mu mikino itandatu.

Rayon Sports yatomboye Gor Mahia muri CECAFA bahuriye no mu mikino ya CAF Confederation Cup
Aya makipe yombi yaherukaga guhanganira i Kigali mu mukino warimo imvura nyinshi
Azam FC ni yo yegukanye igikombe giheruka cya Cecafa mu 2015
Uko amakipe agabanyije mu matsinda y’imikino ya Cecafa Kagame Cup 2018

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza