Rayon Sports yasinyishije undi myugariro wa APR FC

Yanditswe na Jah d’eau Dukuze
Kuya 20 Nzeri 2016 saa 08:32
Yasuwe :
0 0

Yves Rwigema yiyongereye kuri Rwatubyaye Abdoul maze na we ashyira umukono ku masezerano amukura muri APR FC amujyana mu ikipe ya Rayon Sports.

Nkuko byari bimeze kuri Rwatubyaye, Yves Rwigema na we yakuriye mu ishuri rya ruhago rya APR FC gusa we aza kubona amahirwe yo kujya kugerageza amahirwe ku mugabane w’u Burayi. Aha, ni mu ishuri ryigisha ruhago riri mu Mujyi wa Valencia muri Espagne, Academie Futelite hamwe na bagenzi be Neza Anderson na Nkinzingabo Fiston.

Rwigema Yves (wa mbere ibumoso) yanakinnyeho mu ishuri rya ruhago ryo mu Mujyi wa Valencia

Uyu myugariro waje kugaruka mu Rwanda ntabone amahirwe yo kwigaragaza muri APR FC, yarangije gutera umugongo iyi kipe y’ingabo z’igihugu, maze yemera kuzakinira Rayon Sports mu yindi myaka ibiri iriimbere nkuko ubuyobozi bw’iyi kipe bwabitangaje bubicishije ku mbuga nkoranyambaga.

Nubwo Rayon Sports ivuga ko yasinyishije Yves Rwigema, umwe mu bayobozi ba APR FC utifuje ko amazina ye atangazwa, yadutangarije ko ibyo Rayon Sports yakoze nta shingiro bifite kuko uyu musore yari afite amasezerano muri APR FC.

Ati "Nta mwanya uhari wo kuvuga kuri ibyo kuko nta cyabaye, uretse kuba yarakuriye mu ishuri rya ruhago ryacu, Yves Rwigema yari anadufitiye amasezerano. Ese abamusinyishije baba bafite ibaruwa imurekura (release letter)?"

Twashatse kuvugisha Umuvugizi wa APR FC ngo aduhamirize neza iby’amasezerano ya Rwigema ariko ntabwo yabonekaga kuri telefoni ye igendanwa. Uko kandi ni ko byari bimeze ku muvugizi wa Rayon Sports Gakwaya Olivier na we utari uri ku murongo.

Rwigema Yves ukina mu binyuma iburyo, aje muri Rayon Sports kugira ngo arebe ko yakemura ikibazo iyi kipe ifite kuri uyu mwanya, nyuma yaho Ishimwe Issa Zapy bakuye muri Sunrise adashoboye kwigaragaza mu mikino yateguwe na AS Kigali.

Ikipe ya Rayon Sports yasubukuye imyitozo kuri uyu wa Mbere, yari yijeje abafana ko bari buze kubonerayo undi myugariro baguze muri APR FC Rwatubyaye Abdoul, ariko kugeza magingo aya ntawe uzi irengero rye.

Rwigema uri kumwe n'Umutoza Masudi Djuma bivugwa ko yasinye amasezerano y'imyaka ibiri
Yves Rwigema yanakiniye Ikipe y'Igihugu y'abatarengeje imyaka 20

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza