Kwamamaza

Rayon Sports FC mu myiteguro yo kwizihiza isabukuru y’imyaka 50 ibayeho

Yanditswe kuya 22-11-2016 saa 15:00' na Karirima A. Ngarambe


Rayon Sports irateganya gukora isabukuru y’imyaka 50, imaze ibayeho, yishimira intambwe yateye mu mupira w’amaguru mu Rwanda kuva yashingwa kugeza magingo aya, igikomeje kwigarurira imitima y’abatari bake mu bakunzi ba ruhago mu Rwanda no mu mahanga.

Iyi sabukuru iteganyijwe umwaka utaha ni imwe mu ngingo zagarutsweho mu gikorwa cya “Rayon Sports Day 2016” gihuza abahoze bakinira iyi kipe ifite inkomoko i Nyanza, n’abafana bayo baba ku Mugabane w’u Burayi giheruka kubera i Bruxelles mu Bubiligi tariki ya 12 Ugushyingo 2016.

Umuyobozi wa Rayon Sports FC, Gacinya Chance Denis yatangaje ko yishimiye guhura n’abakinnyi yahoze yumva kera akiri umwana ndetse abasaba kuzafatanya nabo kwizihiza isabukuru y’imyaka 50 iyi kipe imaze ibayeho.

Yagize ati “Nashimishijwe cyane no kuza mu Bubiligi nkibonera n’amaso uko ikipe yacu ifite abafana bayikunda cyane kandi ngahura n’abakinnyi benshi bayikiniye njye ntaranavuka. Najyaga mbabona ndi umwana w’umufana kuri stade, nkabona ari ibirangirire none uyu munsi nahuye nabo turaganira duhuza urugwiro ndanezerwa cyane.”

Yakomeje agira ati “Nzishimira kongera kubabona muri Yubile y’imyaka 50 ya Rayon Sports muri Nyakanga 2017, igikorwa turimo dutegura twifuza ko umuntu wese uri mu muryango mugari w’iyi kipe yazacyitabira, yaba abari muri Amerika, u Burayi, Canada, Asia, Afurika n’ahandi hose ku Isi.

Umuyobozi wa ‘Rayon Sports Europe’, ihuriyemo abakunzi b’iyi kipe babarizwa ku mugabane w’u Burayi, Jean Pierre Rugero yemeye ko azakora ibishoboka icyo gikorwa kikitabirwa by’intangarugero.

Perezida wa mbere Wungirije muri Rayon Sports, Martin Rutagambwa, yavuze ko Rayon Sports, abakunzi bayo bakunze kwita Gikundiro, ishaka kurenga imbibi ikagera kure, kandi igakomeza kuba gahuzamuryango nkuko amateka yayo abyerekana ko ihuza Abanyarwanda bayikunda n’inshuti z’abayikunda muri rusange.

Incamake y’amateka ya Rayon Sports igiye kwizihiza isabukuru y’imyaka 50

Iyi kipe yatwaye imitima ya benshi mu bakunda umupira w’amaguru mu Rwanda ndetse no hanze ya rwo, yavutse mu 1965 ku gitekerezo cya Padiri Channoine Arnot wari Umuyobozi wa College Christ Roi i Nyanza mu 1964. Yashinzwe igamije gukura abantu mu bwigunge nyuma y’uko icyitwa siporo cyose cyari kimaze imyaka irindwi gihagaritswe mu gihugu kubera intambara yo mu 1959.

Rayon Sports yari imaze kuvukira i Nyanza mu Murwa w’Ubwami yaje kuba ikipe ikomeye ndetse yegukana ibikombe bitandukanye birimo, bibiri bya shampiyona (1975, 1981 na 2013 ) ndetse n’ibikombe bitatu by’igihugu (1976, 1979, 1982).

Kubera gushaka kwagura imipaka, no gushaka amikoro yisumbuyeho Rayon Sports yaje kuva i Nyanza ku ivuko yerekeza mu Mujyi wa Kigali mu 1986, aho yatwariye ibindi bikombe bine bya shampiyona (1997, 1998, 2002 na 2004), bitanu by’igihugu (1993, 1995, 1998, 2005 na 2016) n’ibindi bikombe byagiye bitegurwa, ndetse ihagirira ishema rikomeye ubwo yegukanaga igikombe cya CECAFA y’amakipe mu 1998, igikuye muri Zanzibar.

Mu bihe byiza n’ubu abakunzi ba Rayon Sports bashimangira ko bagize, ni ku itariki 6 Werurwe 1994, umunsi iyi kipe yakoraga amateka kuri Stade Amahoro i Remera igatsinda 4-1 Al Hilal yo muri Sudani, imwe mu makipe yari akomeye muri Afurika icyo gihe ikanayisezerera mu irushanwa rya CAF nubwo Jenoside yakorewe Abatutsi muri Mata 1994 yatumye iterwa mpaga ku mukino wakurikiyeho.

Mu myaka ine ishize, ku itariki 18 Nzeri 2012, ubuyobozi bwongeye gufata icyemezo cyo gusubira i Nyanza ku ivuko, akaba ariho abakinnyi n’abatoza bacumbikirwa.

Uyu munsi wabaye ibirori bikomeye kuko abafana ibihumbi, ndetse n’imodoka zitagira ingano zuzuye abambaye umweru n’ubururu baririmbaga “Murera, Bakunda Rayon…” bari bayiherekeje ndetse ku muhanda uva i Kigali ugera i Nyanza, hari huzuye abandi bari baje kuyisanganira mu byishimo bitagira uko bingana.

Gusa n’ubwo yagiye ku manywa y’ihangu, igashyikirizwa ku mugaragaro Akarere ka Nyanza kari kemeye kujya kayitera inkunga, iyi kipe ntabwo izizihiza isabukuru y’imyaka 50 ikiri ku cyicaro cy’abasekuruza kuko mu ntangiriro z’umwaka ushize w’imikino yagarutse muri Kigali mu ibanga rikomeye ari naho ibarizwa magingo aya.

Perezida wa Rayon Sports, Gacinya Denis
Umuyobozi wa Rayon Soports Europe, Jean Pierre Rugero
Perezida wa mbere Wungirije muri Rayon Sports, Martin Rutagambwa
Uhereye ibumoso, Umuyobozi wa Rayon Soports Europe, Jean Pierre Rugero, Gacinya Chance Denys uyubora Rayon Sports FC na Martin Rutagambwa, Perezida wa mbere wungirije

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved