00:00:00 IGIHE NETWORK KN KINYARWANDA EN ENGLISH FR FRANCAIS

Raja Casablanca y’abakinnyi 10 yegukanye CAF Confederation Cup ku nshuro ya kabiri

Yanditswe na Eric Tony Ukurikiyimfura
Kuya 11 Nyakanga 2021 saa 10:43
Yasuwe :
0 0

Ikipe ya Raja Casablanca yo muri Maroc, yihagazeho ku mukino wa nyuma wa CAF Confederation Cup nubwo yasoje ari abakinnyi 10 mu kibuga, itsinda JS Kabylie yo muri Algeria ibitego 2-1 kuri uyu wa Gatandatu.

Muri uyu mukino wabereye kuri Stade de l’Amitié y’i Cotonou muri Bénin, Raja Casablanca yabonye ibitego byayo mu minota 14 ya mbere, ibikesha Soufiane Rahimi na Ben Malango.

JS Kabylie yishyuyemo igitego kimwe nyuma y’umunota umwe igice cya kabiri gitangiye binyuze kuri Zakaria Boulahia ndetse yihariye umukino kuva ku munota wa 63 ubwo Omar Arjoune yahabwaga ikarita itukura ku ruhande rwa Raja Casabanca.

Iyi kipe yo muri Algeria yaranzwe no guhuzagurika mu minota ya mbere y’uyu mukino wari witabiriwe n’abafana bake muri iyi stade yakira abantu ibihumbi 20 kubera icyorezo cya COVID-19.

Soufiane Rahimi wabaye umukinnyi w’irushanwa rya CHAN 2020, ni we wafunguye amazamu ku munota wa gatanu ubwo yacengaga umunyezamu Oussama Benbot.

Abakinnyi ba JS Kabylie baburanye bagaragaza ko uyu Munya-Maroc yari yaraririye, ariko umusifuzi Victor Gomes wo muri Afurika y’Epfo, yemeza igitego nyuma yo kwifashisha ikoranabuhanga ry’amashuryo rya VAR.

Rahimi yagize kandi uruhare mu gitego cya kabiri cya Raja ubwo Umunye-Congo Ben Malango yatsindaga ku munota wa 14.

Zakaria Boulahia yatsinze igitego kimwe rukumbi cya JS Kabylie ndetse cyabaye icya gatatu yabonye mu irushanwa ry’uyu mwaka nyuma yo guhindukiza umunyezamu Anas Zniti.

Gutsinda uyu mukino byafashije Raja Casablanca kwegukana CAF Confederation Cup ya kabiri mu myaka ine mu gihe yagejeje ibikombe umunani mu marushanwa ya CAF, ikaba ikipe ya gatanu mu zimaze kwegukana byinshi.

Raja Casablanca yegukanye Champions League inshuro eshatu, CAF Confederation Cup na Super Cup inshuro ebyiri na CAF Cup inshuro imwe.

Al Ahly ni yo imaze kwegukana ibikombe byinshi muri Afurika, aho yatwaye 21, ikurikiwe na Zamalek na yo yo mu Misiri na TP Mazembe yo muri Repubulika Iharanira Demokarasi ya Congo, zombi zifite ibikombe 11 buri imwe mu gihe Etoile du Sahel yo muri Tunisia yatwaye ibikombe umunani.

Uretse kuba yahawe miliyoni 1,25$, Raja Casablanca izakina umukino wa CAF Super Cup uzayihuza n’ikipe izegukana CAF Champions League.

Al Ahly ni yo ihabwa amahirwe yo kwegukana CAF Champions League ku nshuro ya 10 ubwo izaba ikina umukino wa nyuma izahuramo na Kaizer Chiefs yo muri Afurika y’Epfo ku wa Gatandatu utaha mu mujyi wa Casablanca.

JS Kabylie na Raja Casablanca zahuriye ku mukino wa nyuma wa CAF Confederation Cup wabereye i Cotonou
Umunya-Maroc Soufiane Rahimi yishimira igitego cya mbere yatsinze muri uyu mukino
Byari ibyishimo ku bakinnyi ba Raja Casablanca ubwo umukino wari urangiye
Perezida wa CAF, Patrice Motsepe ashyikiriza igikombe Kapiteni wa Raja, Anas Zniti
Umutoza wa Raja Casablanca, Lassaad Chabbi, ateruye igikombe ikipe ye yatwaye
Raja Casablanca yegukanye CAF Confederation Cup ku nshuro ya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .