00:00:00 IGIHE NETWORK KN KINYARWANDA EN ENGLISH FR FRANCAIS

PSG vs Manchester City: Amakuru avugwa mu makipe yombi mbere y’umukino wa Champions League

Yanditswe na Bukuru JC
Kuya 28 Nzeri 2021 saa 08:53
Yasuwe :
0 0

Guhera saa Tatu z’ijoro zo kuri uyu wa Kabiri, tariki ya 28 Nzeri 2021, Paris Saint-Germain yo mu Bufaransa irakira Manchester City yo mu Bwongereza mu mukino w’umunsi wa kabiri wo mu Itsinda A rya UEFA Champions League utegerejwe na benshi.

Paris Saint-Germain iza kuba iri imbere y’abafana bayo kuri Parc des Princes, ishobora gukina uyu mukino ifite Lionel Messi utarakinnye imikino ibiri iheruka muri Shampiyona kubera imvune.

Umutoza w’iyi kipe y’i Paris, Mauricio Pochettino, yavuze ko urutonde rw’abakinnyi bifashishwa kuri uyu mukino rwemezwa kuri uyu wa Kabiri.

Ati “Tuzemeza abakinnyi 11 bazabanza mu kibuga ejo [uyu munsi ku wa Kabiri]. Gusa, ndatekereza ko azaba ari mu bazakina umukino.”

Pochettino yavuze ko Messi utaratsinda igitego mu mikino itatu amaze gukiniramo PSG, akwiye igihe cyo kubanza kumenyera.

Ati “Yamaze imyaka 20 muri Barcelone. Birasanzwe ko yahafataga nko mu rugo, ariko hano ni hashya, nta gihe kinini hishize kuva ahageze.”

Andi makuru meza kuri PSG ni uko Umutaliyani Marco Verratti ukina mu kibuga hagati, ashobora kwifashishwa nyuma yo gukira imvune y’ivi yatumye adakina imikino ine.

Messi utegerejweho igitego cya mbere muri PSG, yatsinze ibitego byinshi (bitandatu) mu mikino ine, kurusha abandi bakinnyi bose bahuye n’amakipe atozwa na Pep Guardiola muri Champions League.

Agaruka kuri uyu mukinnyi, Guardiola utoza Manchester City, yavuze ko byaba byiza akinnye kuri uyu wa Kabiri kuko waba umukino mwiza mu gihe kandi yavuze ko atazi uburyo azahagarikamo ubusatirizi bwa PSG burimo Neymar, Messi na Mbappé.

Ati “Ndatekereza ko umukinnyi nk’uyu ubwe ibikorwa bye birivugira. Twagize amahirwe yo kumubona mu myaka 16 nk’umunyamwuga. Ibyo yakoze birenze kuba byihariye kandi ndizera ko ejo yakina ku bw’inyungu z’umukino.”

“Hamwe n’aba bakinnyi, sinzi uko nabahagarika. Ni beza, impano zabo zituma bigorana kurushaho. Bisaba kugarira neza mu gihe udafite umupira. Ni abakinnyi batatu bashobora gukora icyo bashaka imbere.”

Manchester City yatsinze PSG ku giteranyo cy’ibitego 4-1 muri ½ cya UEFA Champions League y’umwaka ushize mbere y’uko itsindwa na Chelsea ku mukino wa nyuma.

Gusa, nyuma yaho PSG yaguze Messi umaze gutsinda ibitego 120 bya UEFA Champions League, Sergio Ramos watwaye iri rushanwa inshuro enye, umukinnyi w’irushanwa rya EURO 2020 Gianluigi Donnarumma n’abandi benshi.

Aya makipe yombi afatwa nk’afite amafaranga menshi kurusha ayandi muri iyi myaka ya 2000. Manchester City yaguzwe na Abu Dhabi United Group mu 2008 mu gihe PSG ifitwe na Qatar Sports Investments kuva mu 2011.

Ibikombe birindwi mu icyenda bya shampiyona PSG iheruka kwegukana, na bitanu muri birindwi Manchester City yatwaye, byose zabiheshejwe n’ibigo byaziguze. Gusa, intego nyamakuru ni ugutwara Champions League, ariko amakipe yombi amaze gukina umukino wa nyuma inshuro ebyiri agatsindwa.

Manchester City irakina uyu mukino idafite Ilkay Gundogan wagize imvune idakomeye ku mukino wa Southampton mu ntangiriro z’uku kwezi. Gusa, ashobora gusubira mu kibuga nyuma y’ikiruhuko kizakinwamo imikino mpuzamahanga y’ibihugu. Undi udahari ku ruhande rw’iyi kipe yo mu Bwongereza ni Oleksandr Zinchenko ukina inyuma ku ruhande rw’ibumoso.

Aymeric Laporte na Rodri bagarutse ku mukino Manchester City yatsinzemo Chelsea muri Shampiyona ku wa Gatandatu mu gihe John Stones yari ku ntebe y’abasimbura ndetse akaba ashobora kwifashishwa i Paris uyu munsi.

Ibyihariye hagati ya Manchester City na Paris Saint-Germain

  • Paris Saint-Germain na Manchester City zigiye guhura ku nshuro ya gatandatu mu gihe iyi kipe yo mu Bufaransa ikomeje gutegereza gutsinda umukino wa mbere (yatsinzwe itatu, inganya ibiri).
  • Paris Saint-Germain yananiwe gutaha izamu ryayo ritinjiyemo igitego mu mikino ine yahuyemo na Manchester City muri UEFA Champions League.
  • PSG idaheruka gutsindira mu rugo mu mikino itatu iheruka kuhakinira, yanganyije na Club Brugge igitego 1-1 mu mukino w’umunsi wa mbere bituma igeza imikino ine yikurikiranya idatsinda muri iri rushanwa (yanganyije umwe, itsindwa itatu).
  • Manchester City imaze imikino 10 idatsindirwa hanze muri UEFA Champions League (yatsinze imikino umunani, inganya ibiri) mu gihe kandi iheruka gutsindirwa hanze y’u Bwongereza mu Ukuboza 2017 (2-1 ihura na Shakhtar Donetsk).
  • PSG yatsinzwe imikino itatu iheruka kwakiramo amakipe yo mu Bwongereza (ihura na Manchester United mu 2019 no mu 2020, ihura na Manchester City mu 2021).

Imikino iteganyijwe kuri uyu wa Kabiri saa Tatu z’ijoro:

Itsinda A

  • Paris Saint-Germain vs Manchester City
  • RB Leipzig vs Club Brugge

Itsinda B

  • Milan AC vs Atlético Madrid
  • FC Porto vs Liverpool

Itsinda C

  • Ajax vs Besiktas (18:45)
  • Borussia Dortmund vs Sporting CP

Itsinda D

  • Shakhtar Donetsk vs Inter Milan (18:45)
  • Real Madrid vs FC Sheriff
Lionel Messi yitezwe ku mukino PSG yakiramo Manchester City kuri uyu wa Kabiri mu gihe atakinnye ibiri iheruka kubera imvune
Pep Guardiola yavuze ko atazi uburyo ahagarikamo ubusatirizi burimo Neymar, Messi na Mbappé
Manchester City irakina idafite İlkay Gündoğan wavunitse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .