00:00:00 IGIHE NETWORK KN KINYARWANDA EN ENGLISH FR FRANCAIS

Premier League: Manchester City yatunguwe, United, Chelsea na Liverpool zitangira neza (Amafoto)

Yanditswe na Bukuru JC
Kuya 16 Kanama 2021 saa 07:38
Yasuwe :
0 0

Umunsi wa mbere wa Premier League mu mwaka w’imikino wa 2021/22 wakinwe mu mpera z’icyumweru gishize, wasize Manchester City ifite igikombe giheruka itsinzwe na Tottenham igitego 1-0 mu gihe andi makipe arimo Manchester United, Liverpool na Chelsea yitwaye neza agatsinda imikino yayo.

Mu mukino wari witezwe na benshi ku Cyumweru, Tottenham y’umutoza mushya Nuno Espirito Santo, yatsinze Manchester City igitego 1-0.

Tottenham yakinnye uyu mukino idafite rutahizamu wayo ngenderwaho, Harry Kane, wifuzwa bikomeye na Manchester City ishaka kumutangaho asaga miliyoni 120£.

Umutoza Pep Guardiola yari yitabaje abarimo Jack Grealish uheruka kugurwa miliyoni 100£ avuye muri Aston Villa, gusa ntacyo byamufashije imbere ya Tottenham yatsindiwe na Heung-min Son mu minota 10 ya mbere y’igice cya kabiri.

Manchester City ni yo kipe yasoreje muri atandatu ya mbere akomeye, yatsinzwe mu mpera z’icyumweru gishize mu gihe izindi zitwaye neza.

Ku wa Gatanu, Arsenal yatsinzwe na Brentford ibitego 2-0 bya Sergi Canos na Christian Noergaad.

Bukeye bwaho, Manchester United yatsinze Leeds United ibitego 5-1 birimo bitatu bya Bruno Ferandes, icya Mason Greenwood na Fred mu gihe Leicester City yatsinze Wolves 1-0 cyinjijwe na Jamie Vardy.

Ibitego bya Marcos Alonso, Christian Pulisic na Trevoh Chalobah byafashije Chelsea kunyagira Crystal Palace 3-0 mu gihe Mohamed Salah, Firmino na Diogo Jota batsindiye Liverpool ku mukino yatsinzemo Norwich City 3-0.

Mu yindi mikino ya Premier League yabaye mu mpera z’icyumweru, Everton yatsinze Southampton 3-1, Burnley yatsinzwe na Brighton & Hove Albion 2-1, Watford itsinda Aston Villa 3-2 mu gihe Newcastle United yatsinzwe na West Ham United 4-2.

Abafana ba Tottenham bari baje bambaye imipira yanditseho Harry Kane wifuzwa na Manchester City
Jack Grealish wabanje mu kibuga, yagowe no kugira byinshi afasha Manchester City
Grealish ntiyishimiye gutsindwa umukino wa mbere wa Premier League yakiniyemo Manchester City
Myugariro wa Tottenham, Japhet Tanganga, ntiyoroheye Raheem Sterling na Grealish bakinaga ku mpande
Heung-Min Son yatsindiye Tottenham ku mupira yateranye Nathan Ake nyuma yo guherezwa na Steven Bergwijn
Son yishimira igitego yatsinze ku munota wa 55
Nuno Espirito Santo uri gutoza Tottenham mu mwaka wa mbere nyuma yo kuva muri Wolves, yishimira igitego imbere y'abo bakorana
Pep Guardiola ntiyishimiye imikinire y'abakinnyi be

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .