Police FC yatsinzwe na AS Kigali, Seninga akomeza kujya mu kaga

Yanditswe na Uwishyaka Jean Louis
Kuya 2 Ukwakira 2016 saa 08:37
Yasuwe : XX
0

Mu mukino wa gishuti wahuje ikipe ya Police FC na AS Kigali kuri uyu wa Gatandatu kuri Stade ya Kigali, Police Fc yawutsinzwemo ibitego bitatu kuri kimwe bikomeza gushyira ahabi umutoza w’iyi kipe Seninga Innocent.

Police FC itsinzwe uyu mukino nyuma yo guzererwa mu irushanwa ryari ryateguwe na AS Kigali itarenze amajonjora ndetse ikagenda itanitwara neza mu mikino ya gishuti yakinnye.

AS Kigali yari yanganyije na Bugesera FC ubusa ku busa mu mukino wo kwipima wari wabaye ku wa Gatatu w’iki cyumweru, aho amakipe yose ari kwitegura shampiyona.

Nubwo nta kibazo abakinnyi ba Police FC bafite dore ko bahemberwa igihe bakanitabwaho nk’ikipe ya Polisi y’Igihugu, ntibyabujije abasore ba Eric Nshimiyimana badaheruka guhembwa mu mezi abiri ashize kuyirusha no gukinana ishyaka.

Mu gice cya mbere, AS Kigali yabonye uburyo bwinshi imbere ya Police FC yagaragazaga guhuzagurika ndetse bituma Ndahinduka Michel uzwi nka Bugesera afungura amazamu ku munota wa 23 w’umukino.

Mu mpinduka zitandukanye abatoza ku mpande zombi bakoze mu gice cya kabiri, iza AS Kigali ni zo zatanze umusaruro kuko Sebanani Emmanuel wari winjiye asimbuye yafashije bagenzi be kwiharira umukino ndetse na Kabange Twite watsinze igitego cya kabiri.

Police FC itaritwaye neza mu mikino ibanziriza shampiyona yose yakinnye nk’uko byari byitezwe nyuma yo kwiyubaka igura abakinnyi bashya n’umutoza mushya, yaje kubona igitego kimwe cya Japhet Iramurora bita Drogba kitagize icyo gifasha iyi kipe kuko Sebanani yahise atsinda icya gatatu, umukino urangira ari 3-1.

Ku ruhande rw’umutoza wa Police FC, Seninga Innocent, yatangaje ko kuba ikipe ye itari kwitwara neza muri iyi mikino bitamuteye igitutu kuko bimuha amahirwe yo kubona ibyo agomba gukosora akaba yizera ko shampiyona izatangira ihagaze neza.

Nubwo AS Kigali yatsinze uyu mukino, umwuka nturaba mwiza kuko abakinnyi batangaza ko badaheruka guhembwa ariko umuyobozi ushinzwe imibereho y’abakinnyi (Team Manager) , Nshimiye Joseph, avuga ko iki kibazo bagihagurukiye ku buryo bagombaga kubahemba ariko bigahurirana n’impera z’icyumweru (weekend) bityo ngo bakazabona amafaranga ku wa Mbere.

Ikipe ya Police FC ikomeje gutsindwa imikino ya gishuti mu gihe itegereje kwisobanura na Rayon Sports mu mukino wa mbere wa shampiyona izatangira tariki 14 Ukwakira 2016.

AS Kigali yarushuje bigaragara ikipe ya Police Fc birangira inayitsinze
AS Kigal iri mu bibazo byo kudahemba abakinnyi
Kabange Twite yatsindiye AS Kigali igitego cya kabiri
Abakinnyi ba AS Kigali bashimye Imana nyuma yo gutsinda Police FC
Seninga yavuze ko nta gitutu ariho kubera imyitwarire y'ikipe ye
Umutoza w'ikipe y'igihugu Jimmy Mulisa yari yagiye kureba uyu mukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza