Perezida wa Ferwafa, Nzamwita Vincent yamaze kuregwa muri FIFA

Yanditswe na Ishimwe Israel
Kuya 20 Nzeri 2016 saa 09:58
Yasuwe : XX
0

Umuyobozi wa SEC Academy, Munyandamutsa Augustin yareze Umuyobozi w’Ishyirahamwe ry’umupira w’amaguru mu Rwanda, Ferwafa, Nzamwita Vincent De Gaulle muri FIFA amushinja kuyoboza igitugu, kurigisa umutungo ndetse no kudindiza iterambere ry’umupira mu gihugu.

Munyandamutsa Augustin yahagaritswe imyaka ibiri nta gikorwa na kimwe cya ruhago agiramo uruhare mu nteko rusange idasanzwe ya Ferwafa yateranye mu mpera z’icyumweru gishize, ashinjwa imyitwarire idahwitse no kutubaha abayobozi.

Muri Kanama, uyu muyobozi wa SEC ibarizwa mu cyiciro cya kabiri yari yandikiye Nzamwita Vincent de Gaulle amusaba kwegura kubera ngo amakosa atandukanye yagiye akora mu gihe amaze ku buyobozi.

Ayo makosa Munyandamutsa yavugaga ko aganisha ku gusubiza inyuma ruhago ndetse ko Nzamwita yagiye arangwa no kutagaragaza uko amafaranga y’uru rwego akoreshwa bituma bakeka ko habamo inyerezwa.

Mu kiganiro yagiranye na IGIHE, Munyandamutsa yavuze ko yamaze gutanga ikirego mu Ishyirahamwe ry’Umupira w’Amaguru ku Isi, FIFA kandi cyakiriwe nubwo batamubwiye igihe azabonera igisubizo kuko muri iki gihe hari ibibazo byinshi bigomba kwigwaho.

Ati “Ntabwo byari ibyo kwihanganirwa. Yampagarika yagira ate, sinshobora gufungwa umunwa ngo singaragaze ibimunga umupira wacu. Njye ntabwo ndi muri ba bandi batunzwe n’umupira, bashakamo amaronko ahubwo njye ndawutunze kuko nafashe amafaranga yanjye yagombaga gutunga umuryango nyashyiramo gusa simbyicuza kuko umusaruro waragaragaye.”

Ku bijyanye no kuba yarahagaritswe, yagize ati “Ibi ni ibigaragaza intege nke z’ubuyobozi. Ntabwo abantu bagomba kumva ibintu kimwe ahubwo byakabaye umuyoboro w’iterambere bagashyira bya bitekerezo hamwe ariko iyo utangiye kwikiza abo mutavuga rumwe ni ibigaragaza ko unaniwe ahubwo ukwiriye gutanga umwanya abashoboye bagakora.”

Uyu mugabo yari mu bakandida bari bahanganye na Nzamwita mu matora yo kuyobora Ferwafa mu 2014.

Iyi nama y’inteko rusange yemeje ibihano bya Munyandamutsa yanahannye abandi bayobozi babiri barimo Gisanura Raoul Ngenzi wayoboraga Gasabo FC na Kakye Emmanuel wayoboraga Unity FC, abantu yemeza ko aribo babaga mu ba mbere mu gutanga ibitekerezo ndetse no kugaragaza ibitagenda akaba abona ari uburyo bwo gucecekesha n’abasigaye.

Munyandamutsa(ibumoso) yareze Perezida wa Ferwafa, Nzamwita Vincent muri FIFA
Nzamwita Vincent ashinjwa gusubiza inyuma umupira w'amaguru no gusesagura umutungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza