Perezida wa CAF yarekuwe, asabwa kuguma mu Bufaransa

Yanditswe na Eric Tony Ukurikiyimfura
Kuya 7 Kamena 2019 saa 09:20
Yasuwe :
0 0

Perezida w’Impuzamashyirahamwe y’Umupira w’Amaguru muri Afurika, CAF, Ahmad Ahmad, wari watawe muri yombi mu gitondo cyo kuri uyu wa Kane i Paris mu Bufaransa, yamaze kurekurwa, ariko asabwa kutava muri iki gihugu.

Ahmad Ahmad yari yatawe muri yombi n’abapolisi ba OCLCIFF ishinzwe kurwanya ibyaha bya ruswa no kunyereza imisoro ubwo yari muri Hotel de Berri, aho yari yitabiriye Inteko Rusange ya 69 ya FIFA hamwe na bagenzi be.

Mu gihe nta byinshi byatangajwe uyu mugabo yaba akurikiranyweho dore ko atari Umufaransa, ahubwo akomoka muri Madagascar, bivugwa ko yafashwe kubera ihagarikwa ry’amasezerano CAF yari ifitanye na Sosiyete y’Abadage ya Puma, igahitamo gukorana n’iy’Abafaransa ya Technical Steel ibarizwa mu gace ka La Seyne-sur-Mer mu Bufaransa mu Ukuboza 2017.

Puma yari ifite amasezerano afite agaciro k’ibihumbi €312 mu gihe yasheshwe, hakaza Tacticaql Steel yatwaye agera kuri miliyoni $1,19, aho iyi sosiyete bivugwa ko iyoborwa na Ramouald Seiler, inshuti ya Loïc Gerand uba hafi ya Ahmad.

Ubuyobozi bw’u Bufaransa ngo bushobora kuba buri gukurikirana imisoro itarishyuwe muri ubu bucuruzi bwakozwe dore ko Tactical Steel yanditswe mu Bufaransa n’ubwo ikorera mu gace ka La Seyne-sur-Mer.

Ku mugoroba wo kuri uyu wa Kane, nibwo uyu muyobozi yarekuwe, ahabwa pasiporo ye, ariko ngo asabwa kuguma mu Bufaransa.

Ahmad Ahmad w’imyaka 59, uyobora CAF guhera muri Werurwe 2017, yafatiwe mu Bufaransa mu gihe CAF ikomeje kwitegura CAN 2019 itazangira mu Misiri tariki ya 21 uku kwezi ndetse ni nyuma y’amasaha make iyi Mpuzamashyirahamwe yemeje ko umukino wa nyuma wa CAF Champions League utaravuzweho rumwe kubera ikoranabuhanga ry’amashusho rya ‘VAR’uzasubirwamo.

Espérance de Tunis yo muri Tunisie yatwaye igikombe nyuma y’uko Wydad Casablanca yo muri Maroc yanze gusubira mu kibuga ubwo umukino wari ugeze ku munota wa 60, yasabwe kugisubiza, amakipe yombi akazakina undi mukino.

Perezida wa CAF, Ahmad Ahmad yarekuwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza