00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yashimiye Arsène Wenger uri mu Rwanda

Yanditswe na Habimana Sadi
Kuya 15 Gicurasi 2021 saa 08:52
Yasuwe :
0 0

Perezida Paul Kagame yasobanuye uburyo yishimiye kwakira uwahoze atoza Arsenal, Arsène Wenger, uri mu Rwanda, aho yitabiriye inama ya Komite Nyobozi y’Impuzamashyirahamwe y’Umupira w’Amaguru muri Afurika, CAF, yabaye kuri uyu wa Gatandatu.

Arsène Wenger watoje Arsenal imyaka 22 kugeza mu 2018, kuri ubu akaba ashinzwe iterambere ry’umupira w’amaguru muri FIFA, ni umwe mu bitabiriye iyi nama, ari kumwe na Perezida wa FIFA, Gianni Infantino.

Mu ijambo yagejeje ku bitabiriye iyi nama, Perezida Kagame yabasabye guhindura imyumvire kugira ngo umupira w’amaguru uhindure Afurika.

Umukuru w’Igihugu yagaragaje ko yishimiye kwakira mu Rwanda abayobozi b’umupira w’amaguru ku Isi no muri Afurika, ariko by’umwihariko Arsène Wenger watoje ikipe ya Arsenal, na we afana.

Ati “Nsoza, njye ubwanjye ndashaka gushimira cyane Arsène Wenger, hari impamvu nyinshi nshaka kubikora; yahoze ari umutoza w’ikipe imba ku mutima ya Arsenal, uretse no kuba ikipe nkunda yari umutoza mwiza. Byari impurirane ya byombi, kuba yaratozaga ikipe nkunda ku Isi, sinigeze nyitera umugongo n’igihe bitari bimeze neza kugeza n’uyu munsi.”

Yakomeje agira ati “Nashakaga kumushimira nanamubwire ko yakoze akazi keza mu ikipe, ni igitekerezo cyanjye kandi ndizera ko azakora akazi keza hamwe na FIFA mu guteza imbere umupira w’amaguru. Wakoze cyane, twishimiye kukugira hano.”

Mu kiganiro Umukuru w’Igihugu aherutse kugirana n‘ikinyamakuru l’Equipe cyo mu Bufaransa, nabwo yari yashimangiye ko nubwo Arsenal itari mu bihe byiza ariko atigeze ayitera umugongo.

Ati “Ndi umufana wa Arsenal, kabone nubwo ikipe ifite ibibazo muri iyi minsi. Turi kure y’ibihe bya Thierry Henry cyangwa Patrick Vieira batwaraga ibikombe."

Usibye kuba Perezida Kagame ari umufana wa Arsenal FC, ni n’umwe mu bayobozi bakunda umupira w’amaguru ndetse afite n’igikombe cyimwitirirwa cya Cecafa Kagame Cup, gikinirwa n’amakipe yo muri Afurika y’Iburasirazuba n’iyo Hagati.

Ku wa 3 Gicurasi 2014, ikipe ya Arsenal yamugeneye impano azishyikirizwa na Tony Adams wahoze ari kapiteni wayo.

Tony Adams yatangaje ko iyi kipe yamugeneye umupira wo gukina wa Arsenal, imuha imipira itatu yo kwambara ya Arsenal hariho umwe uriho amazina ye na numero imwe.

Mu 2007 ubwo Perezida Kagame yizihizaga isabukuru y’imyaka 50 y’amavuko, umutoza Arsène Wenger [watozaga Arsenal] yamuhaye impano y’idarapo ry’iyi kipe ririho imikono y’abakinnyi bose mu kumushimira.

Mu Ukwakira 2013, Perezida Kagame yari ku kibuga cya Arsenal, Emirates, ubwo iyi kipe yatsindaga Napoli ibitego 2-0 mu mikino ya UEFA Champions League.

Icyo gihe yanyuzwe no kureba uwo mukino. Yagize ati “Nishimiye kurebera umupira i Emirates. Ndashimira Wenger na Arsenal bagarutse ku mukino mwiza wo gutsinda.”

Perezida Kagame ni umufana wa Arsenal kuva mu 1996, aho avuga ko ayikundira umukino mwiza ikina yatsinda cyangwa igatsindwa.

Arsenal ifitanye umubano n’u Rwanda kuko kuva muri Gicurasi 2018 Ikigo cy’Igihugu cy’Iterambere (RDB) cyinjiye mu bufatanye bw’imyaka itatu n’iyi kipe ya Arsenal FC yo muri Premier League, u Rwanda ruyibera umuterankunga wa mbere ku maboko y’imipira, aho yambara ‘Visit Rwanda’ ku kuboko kw’ibumoso ku ikipe nkuru, iy’abatarengeje imyaka 23 no mu ikipe y’abagore.

Uretse umupira w’amaguru, Perezida Kagame yabwiye l’Equipe ko ari umukunzi wa Shampiyona ya Basketball muri Leta Zunze Ubumwe za Amerika (NBA), by’umwihariko ikipe ya Golden State Warriors.

Perezida Kagame yitabiriye inama ya Komite Nyobozi ya CAF yabereye i Kigali kuri uyu wa Gatandatu
Perezida Paul Kagame yashimiye Arsène Wenger ku kazi yakoze muri Arsenal ubwo yari ayibereye umutoza
Umukuru w'Igihugu yasabye abanyafurika guhindura imyumvire kugira ngo umupira w'amaguru uhindure Afurika
Arsène Wenger watoje Arsenal imyaka 22, kuri ubu ni Umuyobozi ushinzwe iterambere ry'umupira w'amaguru muri FIFA

Amafoto: CAF


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .