Kwamamaza

Pépinière FC ishobora gukora amateka yo gukina shampiyona idahemba abakinnyi

Yanditswe kuya 7-09-2016 saa 07:18' na Manzi Rema Jules


Ntibisanzwe bimenyerewe ko ikipe ishobora kubaho idafite ingengo y’imari shingiro izayifasha kwishyura abatoza, abakinnyi ndetse n’iyo gukoresha mu buzima bwa buri munsi, ariko Pépinière FC yazamutse mu cyiciro cya mbere uyu mwaka igiye kuba iya mbere ibikoze kandi ntibizayibuze kugera ku ntego zayo.

Ubwo Pépinière FC yari mu rugamba rwo kuzamuka mu cyiciro cya mbere, yamaze iminsi ifashwa n’Akarere ka Muhanga kashakaga kuyisimbuza AS Muhanga yamanutse mu cyiciro cya kabiri ndetse nyuma yo kuzamuka, ibiganiro hagati y’abayobozi bayo n’aka Karere byarakomeje baza kutumvikana ku izina rishya ryahabwa iyo kipe yaba ifashwa n’Akarere bituma ibiganiro bihagarara.

Kuva ibyo kwiyomeka ku Karere ka Muhanga byanze, ubuyobozi bw’iyi kipe bwakomeje gushaka abandi baterankunga bakemera gufatanya na bo biranga, bafata umwanzuro w’uko ikipe izakinisha abakinnyi bakiri bato bashaka kwigaragaza batazabasaba amafaranga kuko nta ngengo y’imari yateganyijwe nk’uko Perezida wayo Munyankumburwa Jean Marie yabitangarije IGIHE.

Ati “Nta ngengo y’imari twateganyije y’ikipe. Nta baterankunga twabonye, twahisemo ko izakomeza kubaho nk’uko yabagaho mu cyiciro cya kabiri. Komite ni yo izajya yishakamo ibikenewe nk’uko yabikoraga. Birumvikana tuzakinisha abakinnyi bakiri bato batabonaga umwanya wo gukina ahandi tubereke gahunda yacu ko atari iy’amafaranga ahubwo ko uzigaragaza amakipe akomeye akamushima tuzamureka akagenda.”

Bitewe n’uko muri aba bakinnyi ngo bakeneyemo abafite ubunararibonye bo kubereka icyo gukora n’uko bagomba kwitwara ku makipe akomeye, ubuyobozi ngo bwahisemo kuzana rutahizamu witwa Joseph bakuye muri Villa SC muri Uganda akaba ari we witezweho kubafasha kwirinda kumanuka mu cyiciro cya kabiri.

Uyu muyobozi anavuga ko ikipe itaje gushaka ibikombe kuko idafite ubushobozi bwo kubihanganira n’amakipe akoresha amafaranga menshi nka APR FC, Rayon Sports, AS Kigali n’izindi uretse ko ngo ikiguyeho bitayigwa nabi.

Intego ibyiri z’ingenzi z’iyi kipe ngo ni ukuguma mu cyiciro cya mbere no guha umwanya abakinnyi bato bakigaragaza ababonye amakipe bakagenda hakaza abandi mu rwego rwo gufasha igihugu kurushaho kubona impano nshya mu mupira w’amaguru.

Pépinière FC yamaze kubona umwe mu batoza bafite amateka yo gukinisha abana bato ndetse no gufata umukinnyi utazwi akamugira igihangange, Kayiranga Baptiste umaze no kuyitoza mu mikino ibiri ya gicuti harimo uwa mbere yatsinzwe na Rayon Sports ibitego 4-1 ndetse n’umukino yanganyijemo na AS Kigali ibitego 2-2.

Abakinnyi b'iyi kipe ngo bagomba kumva ko batazakinira amafaranga ahubwo ko ari ishyaka ryo kwigaragaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved