Oumar Sidibé yasinyiye gukinira Rayon Sports

Yanditswe na Eric Tony Ukurikiyimfura
Kuya 5 Kanama 2019 saa 03:16
Yasuwe :
0 0

Rutahizamu w’Umunya-Mali, Oumar Sidibé, w’imyaka 29 yasinyiye gukinira Rayon Sports mu gihe cy’imyaka ibiri iri imbere nyuma y’uko yari amaze icyumweru ageze mu Rwanda.

Uyu mukinnyi wabanje kutagira ibyo yumvikanaho na Rayon Sports, yatangiye imyitozo ku wa Kane nimugoroba nyuma yo kumara amasaha menshi aganira Perezida wa Rayon Sports, Munyakazi Sadate, agahabwa ibihumbi bibiri by’amadolari.

Ku wa Gatanu, Sidibé yagaragaye mu mukino wa gicuti Rayon Sports yatsinzemo AS Kigali igitego 1-0, aho uyu Munya-Mali yasimbuye Mugheni Fabrice, agatanga umupira wavuyemo igitego cyatsinzwe na Michael Sarpong.

Sidibé yagombaga kurara asinye ku wa Gatanu, ariko ntibyakunda, birangira ku gicamunsi cyo kuri uyu wa Mbere asinyiye Gikundiro imyaka ibiri bari bumvikanye akiri muri Mali, ahabwa ibihumbi birindwi by’amadolari ya Amerika.

Oumar Sidibé yatangiye gukina umupira w’amaguru ku rwego rwisumbuye mu Ikipe ya AS Real Bamako y’iwabo muri Mali mu 2007, ayimaramo imyaka ine, aho yayivuyemo mu 2011, yerekeza muri Stade Malien.

Mu 2013, yerekeje muri Al Hilal Club Omdurman izahura na Rayon Sports muri CAF Champions League, ayikinira imyaka itatu, aho mu mpera za 2015, yerekeje muri AS Vita Club yo muri Repubulika Iharanira Demokarasi ya Congo, na yo ayikinira imyaka ibiri.

Umwaka ushize w’imikino yawukinnye muri Hatayspor yo mu Cyiciro cya Kabiri muri Turikiya, mbere y’uko agaruka muri AC Djoliba y’iwabo muri Mali muri Mutarama uyu mwaka, aho yavuye nyuma yo kurambagizwa na Rayon Sports.

Sidibé yabaye Umunya-Mali wa gatanu usinyiye Rayon Sports nyuma ya Moussa Camara, Tidiane Koné, Ismala Diarra na Alhassane Tamboura mu gihe kandi Mohamed N’Diaye na we ategerejwe i Kigali kuri uyu wa Mbere nyuma yo kubanza gukora ubukwe.

Oumar Sidibé yasinye imyaka ibiri muri Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza