Ombolenga Fitina mu nzira ijya gusimbura Makenzie muri Gor Mahia

Yanditswe na Ngabo Roben
Kuya 4 Ugushyingo 2018 saa 08:14
Yasuwe :
0 0

Myugariro wa APR FC n’ikipe y’igihugu Amavubi, Ombolenga Fitina, arifuzwa na Gor Mahia FC yo muri Kenya ngo abe umusimbura wa Nizigiyimana Karim Makenzi wayikiniye kuva 2014.

Nyuma yo kugera mu matsinda ya CAF Confederation Cup 2018 ariko igasezererwa kuko Rayon Sports na USM Alger zayije imbere, Gor Mahia FC yatwaye igikombe cya shampiyona muri Kenya irifuza kurenga iki cyiciro.

Ikomeje kwiyubaka igura abakinnyi inakina imikino ya gicuti ikomeye. Kuri uyu wa kabiri tariki 6 Ugushyingo 2018 izakina umukino wa gicuti na Everton kuri Stade Goodison Park mu Bwongereza.

Nubwo myugariro w’iburyo, kapiteni w’ikipe y’igihugu y’u Burundi Nizigiyimana Karim Makenzie ari ku rutonde bajyanye mu Bwongereza ariko ntabwo ari mu bo iyi kipe bita K’Ogalo yatanze muri CAF izakoresha muri CAF Champions League izatangira tariki 27 Ugushyingo 2018.

Iyi kipe bivugwa ko itishimiye urwego uyu myugariro ariho bityo ishaka undi ukina ku ruhande rw’iburyo ukomeye wahanganira umwanya na Philemon Omondi Otieno basanganywe muri iri soko ryo kugura abakinnyi ryatangiye tariki 1 Ugushyingo 2018 muri Kenya.

Amakuru agera kuri IGIHE yemeza ko bamwe mu bashinzwe kugurira Gor Mahia FC abakinnyi bahamagaye myugariro wa APR FC Ombolenga Fitina mu cyumweru gishize bamusaba ko batangira ibiganiro n’ikipe ye kuko akiyifitiye amasezerano y’umwaka.

Ombolenga utashatse kugira icyo avuga kuri iyi nkuru kuko amakipe yombi atarumvikana ngo bashimye imikinire ye muri CECAFA Senior Challenge cup 2017 yabereye muri Kenya ubwo yazaga mu bakinnyi 11 bitwaye neza muri iryo rushanwa ryarangiye u Rwanda rusezerewe mu matsinda.

Mu gihe amakipe yombi yakumvikana, Ombolenga Fitina wavutse tariki 20 Gicurasi 1996 yaba agiye muri Gor Mahia nyuma y’imyaka ibiri mukuru we Abouba Sibomana ayivuyemo kubera ikibazo cy’imvune n’ubu itarakira nubwo abarwa nk’umukinnyi wa APR FC.

Ombolenga Fitina wigaragaje muri CECAFA y'ibihugu yabereye muri Kenya yatewe imboni n'abayobora Gor Mahia
Ubu ni umwe mu bo APR FC igenderaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza