Kwamamaza

Nyuma y’imyaka 10, Ben Mwalala yahishuye impamvu atakiniye Rayon Sports na APR FC

Yanditswe kuya 10-10-2016 saa 15:49' na Jah d'eau Dukuze


Bernard Mwalala wahoze ari umukinnyi w’amakipe ya Yanga na Villa, yatangaje ko gukunda amafaranga kw’abayobozi b’amakipe yo mu Rwanda, ari byo yatumye adakinira Rayon Sports na APR FC zari zamwifuje mu mwaka wa shampiyona wa 2006.

Uyu mugabo kuri ubu utoza ikipe ya Nzoia United FC y’iwabo muri Kenya, yaje kwigaragariza aka karere ubwo yafashaga ikipe ya SC Villa kwegukana igikombe cya CECAFA nyuma yo gutsinda ibitego bibiri muri bitatu iyi kipe yo mu Bugande yanyagiriye APR FC ku mukino wanyuma i Mwanza.

Amakipe menshi yo muri aka karere arangajwe imbere na Rayon Sports yo mu Rwanda, yahise atangira kwifuza uyu rutahizamu w’Umunyakenya, gusa biza kurangira yerekeje muri Yanga yo muri Tanzania. Amakuru yavugwaga i Kigali, ni uko ngo uyu musore yaba yarasinyiye Rayon Sports, ariko akaza kubuzwa kuyikinira. Ibi ariko bitandukanye n’ibyo Mwalala yadutangarije muri iki gitondo.

“Nashakaga gukinira Rayon Sports. Ni yo kipe yari indi ku mutima kuko nkunda gukinira amakipe afite abafana. N’aba-Rayon bari bankuruye. Naje gusinyira ikipe ya Rayon Sports ariko kuko APR FC yari ifite amafaranga iza kuvugana n’ubuyobozi bwa Rayon Sports ku buryo bwemewe n’amategeko ibumvisha ko bangurisha”.

“Rayon Sports yari yaranguze amadorali ibihumbi bitandatu(hafi 4 800 000Frw) gusa APR FC ibabwira ko inkeneye ni ko kuganira iyisubiza amafaranga banguze yongeraho n’ibihumbi bibiri by’amadorali biba umunani”.

“Abayobozi ba Rayon Sports bahise bambwira ngo ninjye muri APR FC ngo ni yo inshaka. Ubwo nari niteguye kujya muri APR FC, Yanga na bwo yaje guca inyuma ihita ivugana n’ubuyobozi bwa APR FC ibabwira ko iri bubungure maze na bo barandeka ndagenda nyuma yo guhabwa ibihumbi 10 by’amadorali”.

“Urebye byose byatewe n’abayobozi b’ayo makipe(Rayon Sports na APR) bikundiye amafaranga kurusha ibindi. Gusa njye rwose nashakaga gukinira Rayon Sports ariko ubuyobozi bwayo burantanga.”

Ben Mwalala(ibumoso) kuri ubu ni umutoza wa Nzoia United FC yo muri Kenya

Bernard Mwalala yahamije ko nta muntu wigeze amubuza gukina mu Rwanda, ko ahubwo abayobozi ba Rayon Sports bamutegetse kujya gukina muri APR FC bamubwira ko ari ikipe ya gisirikare, ikintu kuri we abona cyaratewe n’uko batashakaga guhomba amafaranga bari bamwungutseho.

Ikibazo cya Mwalala Ben, cyongeye kugaruka muri ruhago nyarwanda, nyuma yaho ikipe ya Rayon Sports isinyishije myugariro wa APR FC Rwatubyaye Abdoul, ariko kuri ubu irengero rye rikaba ritazwi. Ibi byatumye abafana bamwe bahuza igenda rye n’iry’uyu munyakenya, ni mu gihe hagitegerejwe umwanzuro wa komisiyo y’amarushanwa ya Ferwafa kuri Rwatubyaye na Imanishimwe,uzatangazwa muri iki cyumweru.

Twagerageje kuvugisha Muvunyi Paul wayoboraga Rayon Sports muri iyo myaka ngo tumubaze irengero ry’amafaranga yagurishijwe Mwalala, gusa ntabwo byadukundiye. Ku rundi ruhande, Nzamwita Vincent De Gaulle wari Umunyamabanga wa APR FC icyo gihe, bivugwa ko ari we wagurishije Mwalala muri Yanga ku madorali ibihumbi 10.

Uretse gukinira amakipe ya Nzoia ya Kenya, Villa ya Uganda, na Coastel naYanga za Tanzania, Mwalala(iburyo) yanakiniye ikipe y'igihugu ya Kenya
Ikibazo cya Rwatubyaye Abdoul cyatumye abantu bongera kwibuka ibya Ben Mwalala

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved