Ntabwo nzanywe mu Rwanda na APR FC cyangwa Amavubi-Gomes

Yanditswe na Jean de Dieu Dukuze
Kuya 14 Nzeri 2016 saa 10:05
Yasuwe : XX
0

Uwahoze ari umutoza wa Rayon Sports Didier Gomes Da Rosa, yahakanye amakuru yavugaga ko agiye kuza mu Rwanda kugirana ibiganiro n’ikipe ya APR FC avuga ko urugendo rwe mu rw’imisozi igihumbi rushingiye ku biruhuko gusa.

Mu cyumweru gishize nibwo uwigeze kuba umutoza wa Rayon Sports Didier Gomes Da Rosa yatandukanye n’ikipe ya CS Constantine yo muri Algérie, ahita yandika amagambo ku rukuta rwe rwa Facebook avuga ko igihe kigeze kugira ngo agaruke mu rw’imisozi 1000 byatumye abantu benshi batangira kwibaza niba ari mu biganiro byo gutoza Amavubi cyangwa APR FC dore ko aya makipe yose arimo gushaka abatoza.

Mu kiganiro yagiranye na IGIHE, uyu Mufaransa wakoze amateka muri Rayon Sports akayihesha igikombe cya shampiyona yari imaze imyaka icyenda itazi uko gisa, yavuze ko ataje mu Rwanda mu biganiro n’ikipe iyo ariyo yose ngo ayitoze ahubwo nk’igihugu yagiriyemo ibihe byiza kandi kimuhora ku mutima ashaka kuza kuhakorera ‘ibiruhuko’.

Yagize ati «Ndimo gushaka ibyangombwa by’inzira. Ndashaka kuza mu biruhuko mu Rwanda. Nta kipe yo mu Rwanda ndimo kuganira nayo, hari amakipe abiri yo muri Afurika (yo munsi y’ubutayu Bwa Sahara) anshaka n’imwe yo muri Algérie ariko ndacyashaka amakuru ahagije kugira ngo mfate icyemezo. »

Muri iki gihe mu Rwanda hari amakipe abiri ashaka abatoza harimo ikipe ya APR FC yamaze kwirukana Kanyankore Gilbert Youndé ubu ikaba ifitwe na Rwasamanzi Yves by’agateganyo ndetse n’ikipe y’igihugu Amavubi yirukanye Jonathan Mckinstry kuri ubu akaba nta mutoza afite ndetse perezida wa Ferwafa, Nzamwita Vincent de Gaulle aherutse gutangaza ko gushaka umutoza byatangiye ariko bazamuhabwa n’ishyirahamwe ry’umupira w’amaguru mu Budage.

Gomes yahesheje Rayon Sports igikombe cya shampiyona iheruka

Didier Gomes yageze mu Rwanda kuwa Gatanu tariki ya 19 Ukwakira 2012, mu mwaka n’igice yamaze atoza Rayon Sports akaba yarayifashije kwegukana igikombe cya shampiyona ya 2012/2013, aho yari yasanze iyi kipe iri ku mwanya wa cyenda itorohewe n’ibihe yarimo.

Kubera ibibazo by’amikoro byatumye uyu mutoza amara amezi atatu adahembwa ahitamo kwegura ikipe ayisize ku mwanya wa kabiri nyuma y’imikino ibanza ya shampiyona y’uyu mwaka w’2013/2014 yerekeza muri Cotonsport de Garoua muri Cameroon ahantu atatinze ahita ajya muri CS Constantine muri Algérie ariyo baherutse gutandukana


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza