00:00:00 IGIHE NETWORK KN KINYARWANDA EN ENGLISH FR FRANCAIS

Nta mukinnyi wa Real Madrid uri mu bo Espagne izakoresha muri Euro 2020

Yanditswe na Bukuru JC
Kuya 24 Gicurasi 2021 saa 03:58
Yasuwe :
0 0

Umutoza w’Ikipe y’Igihugu ya Espagne, Luis Enrique, yahamagaye abakinnyi 24 azifashisha mu Gikombe cy’u Burayi (EURO 2020) batarimo n’umwe wo muri Real Madrid.

Kapiteni wa Real Madrid, Sergio Ramos, ntiyahamagawe nyuma yo kugira imvune yatumye asiba imikino isoza umwaka w’imikino wa 2020/21 kuva muri Werurwe.

Mu bakinnyi Luis Enrique yahamagaye harimo myugariro wa Manchester City, Aymeric Laporte, wahawe ubwenegihugu bwa Espagne avuye mu Bufaransa ndetse bikaba biheruka kwemerwa na FIFA.

Ni umwe mu bakinnyi 10 bakina muri Premier League bahamagawe na Enrique. Abandi barimo umunyezamu Robert Sanchez wa Brighton, myugariro Diego Llorente wa Leeds United na rutahizamu Adama Traoré wa Wolves.

Sergio Ramos yakiniye Espagne mu mikino yo gushaka itike y’Igikombe cy’Isi cya 2022 yabaye muri Werurwe, asimburwa mu mukino banganyijemo n’u Bugiriki mbere yo gusimbura mu minota ya nyuma y’umukino batsinzemo Kosovo.

Kuva icyo gihe, inshuro imwe yongeye kugaragara mu kibuga ni mu mukino wo kwishyura wa ½ cya UEFA Champions League ubwo Real Madrid yatsindwaga na Chelsea ibitego 2-0 tariki ya 5 Gicurasi 2021.

Luis Enrique yavuze ko yababajwe no kutagira uyu mukinnyi mu bo azakoresha muri Euro 2020 izaba hagati ya tariki ya 11 Kamena n’iya 11 Nyakanga 2021.

Ati “Ni icyemezo gikomeye ariko [Ramos] ntiyakinnye muri uyu mwaka w’imikino kandi kwitoza byari ikibazo kuva muri Mutarama. Ejo hashize [ ku Cyumweru] naramuhamagaye turavugana.”

Enrique yakabaye yahamagaye abakinnyi 26 nyuma y’uko UEFA yongereyemo abandi batatu mu basanzwe kubera ibihe bya COVID-19, ariko we yiyemeje gufata 24 gusa.

Abakinnyi bahamagawe mu Ikipe y’Igihugu ya Espagne:

Abanyezamu: Unai Simon (Athletic Bilbao), David de Gea (Manchester United) na Robert Sanchez (Brighton).

Ba myugariro: Jose Gaya (Valencia), Jordi Alba ( FC Barcelone), Pau Torres (Villarreal), Aymeric Laporte (Manchester City), Eric Garcia (Manchester City), Diego Llorente (Leeds) na Cesar Azpilicueta (Chelsea).

Abakina hagati: Sergio Busquets (FC Barcelone), Rodri (Manchester City), Pedri (FC Barcelone), Thiago Alcantara (Liverpool), Koke (Atlético Madrid), Fabian Ruiz (Napoli) na Marcos Llorente (Atlético Madrid).

Ba rutahizamu: Dani Olmo (RB Leipzig), Mikel Oyarzabal (Real Sociedad), Alvaro Morata (Juventus), Gerard Moreno (Villarreal), Ferran Torres (Manchester City), Adama Traoré (Wolves) na Pablo Sarabia (Paris St-Germain).

Luis Henrique yavuze ko yababajwe no kudahamagara Sergio Ramos mu bakinnyi azakoresha muri Euro 2020
Ramos amaze iminsi yaravunitse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .