Kwamamaza

“Nta mukinnyi nshaka uza kotsa ibigori muri Rayon Sports, abo nzabirukana” Masoudi

Yanditswe kuya 13-09-2016 saa 17:00' na IGIHE


Umutoza wa Rayon Sports Masoudi Djuma uherutse gusezerera abakinnyi bane muri Rayon Sports yaciye amarenga y’uko hari abandi bashobora kwerekwa imiryango mu gihe batagaragaje urwego yifuza, avuga ko bashobora kumara umwaka wose bicaye bahemberwa ubusa, ibyo yagereranyije no “kotsa ibigori”.

Mu kwezi gushize Rayon Sports yasezereye abakinnyi bane barimo Ndacyayisenga Alexis, Mugenzi Cedrick, Kanamugire Moses na Musoni Théophile wari umuzamu wa gatatu utarigeze akinishwa na rimwe umwaka wose ushize.

Umutoza Masoudi Djuma yongeye guca amarenga ko ashobora gusezerera abandi bakinnyi igihe badakoresheje imbaraga zose ngo bigaragaze ko bashobora kumva uburyo ashaka ko bakina mbere y’uko ikipe itanga urutonde ndakuka rw’abakinnyi izakoresha umwaka utaha w’imikino.

Yagize ati “Narabivuze nta mukinnyi nshaka uza kwicara ku ntebe arimo kotsa ibigori hariya. Buri wese yaje gukina, nzamuha iminota yo gukina nibimunanira mwirukane. Buri mukinnyi agomba gukora agahembwa amafaranga akwiriye. Atari bya bindi ushyira umukinnyi hariya akabyibuhira ku ntebe y’abasimbura.”

Ibi Masoudi yabitangaje mu gihe iyi kipe izitabira imikino ya Orange CAF, Confederation Cup yaguze abakinnyi batandukanye mu rwego rwo kurushaho kwiyubaka no kwitegura shampiyona y’umwaka utaha.

Rayon Sports yaguze abakinnyi bagera kuri 14 bashya baje gusimbura abo yirukanye n’abo yagurishije barimo ba rutahizamu bayitsindiye ibitego byinshi umwaka ushize Ismaila Diarra na Davis Kasirye bagiye muri DCMP yo muri Congo Kinshasa, Imanishimwe Emmanuel wagiye muri APR FC na Tubane James wagiye muri AS Kigali.

Mu bakinnyi yaguze harimo barimo Nova Bayama wavuye muri Mukura VS, Senyange Yvan wahoze muri Gicumbi FC, Lomami Frank wavuye muri Musanze FC, Nahimana Shasir wavuye muri Vital’o mu Burundi, Ishimwe Issa Zapi wakinaga muri Sunrise FC, Nigimbere Fabrice wavuye muri Gasabo FC n’abakinnyi batatu Rayon Sports yazamuye mu ikipe y’abana iba i Nyanza barimo Cyimana Willy Hamza, Idrissa Nsengiyumva na Hakizimana Hassan.

Uretse aba yanazanye rutahizamu Moussa Camara ukomeje no kwigaragaza, myugariro wo hagati Mutsinzi Ange ’Jimmy’ wakiniraga AS Muhanga na myugariro wakiniraga APR FC Rwatubyaye Abdoul uherereye muri Uganda bitaramenyekana niba azakinira iyi kipe y’i Nyanza muri uyu mwaka.

Masoudi Djuma arashaka abakinnyi bazi icyo gukora muri Rayon Sports

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved