Nta mahirwe menshi mfite- Mashami avuga ku kongererwa amasezerano mu Amavubi

Yanditswe na Eric Tony Ukurikiyimfura
Kuya 10 Gashyantare 2021 saa 12:17
Yasuwe :
0 0

Umutoza Mukuru w’Ikipe y’Igihugu, Mashami Vincent, yavuze ko nta mahirwe menshi abona afite yo gukomeza gutoza Amavubi kuko atari we utanga ako kazi.

Amasezerano y’Umutoza Mashami yamaze kugera ku musozo ndetse haribazwa niba ari we uzatoza Ikipe y’Igihugu mu mikino ibiri yo muri Werurwe (ya Cameroun na Mozambique) yo gushaka itike y’Igikombe cya Afurika cya 2021 kizaba muri Mutarama 2022.

Mu kiganiro yagiranye n’abanyamakuru kuri uyu wa Gatatu, Mashami Vincent, yavuze ko nta mahirwe menshi abona afite yo kugumana akazi k’Ikipe y’Igihugu.

Ati “Amahirwe menshi urakoze kuyampa ariko icyo nakubwira ni uko nta mahirwe menshi mfite yo gukomeza aka kazi kuko sinjye ugatanga kandi si njye ukiha. Wenda wowe ni ko ubibona ariko si ko njye mbibona.”

“Ku bijyanye n’imyiteguro, abakinnyi twabahaye gahunda, twabahaye amatariki umukino uzabera kandi tubabwira ko bagomba gukomeza gukora ku giti cyabo, ariko turashaka ko no muri raporo tuzatanga tuzashyiramo n’ibyifuzo byacu byazafasha abakinnyi, uwo ari we wese uzayitoza, azaba akeneye abo bakinnyi.”

Umuyobozi wa Siporo muri Minisiteri ya Siporo, Rurangayire Guy, yavuze ko Mashami atari kamara mu Amavubi, yemeza ko hari gushakwa umutoza.

Ati “Mashami ntabwo ari kamara, nta nubwo Ikipe y’Igihugu yamuzirikiweho, nibaza ko mushobora gutegereza, igihe nikigera umutoza azatangazwa, ari gushakwa.”

Yakomeje agira ati “Uko umutoza azashakwa muzabimenyeshwa, tuzabamurikira umutoza mu gihe cya vuba mbere y’uko dukina umukino na Mozambique.”

Mu masezerano Mashami Vincent yahawe muri Gashyantare 2020, yasabwe kurenga amatsinda ya CHAN 2020 no kwitwara neza mu mikino yo gushaka itike y’Igikombe cy’Isi cya 2022 na CAN ya 2021.

Mashami yageze ku nshingano yahawe muri CHAN 2020 ariko afite amanota abiri gusa mu mikino ine yakinnye mu gushaka itike ya CAN 2021, aho u Rwanda ruri mu itsinda F hamwe na Cameroun, Mozambique na Cap-Vert.

Imikino yo mu matsinda yo gushaka itike y’Igikombe cy’Isi cya 2022 kizabera muri Qatar yimuriwe muri Kamena 2021 kubera icyorezo cya COVID-19 cyibasiye Isi.

Umutoza Mukuru w’Ikipe y’Igihugu, Mashami Vincent, yavuze ko nta mahirwe menshi abona afite yo gukomeza gutoza Amavubi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .