Nta magambo menshi dukeneye- Masoudi abwira abayobozi n’abafana ba Rayon Sports

Yanditswe na Manzi Rema Jules
Kuya 20 Mata 2017 saa 12:21
Yasuwe :
0 0

Umutoza w’Ikipe ya Rayon Sports,bMasoudi Djuma, yasabye abayobozi n’abafana ko muri iki gihe ategura umukino ukomeye cyane na Rivers United ikipe ye isabwamo kwishyura ibitego bibiri ikanarenzaho kugira ngo ijye mu matsinda ya CAF Confederation Cup, nta magambo menshi akenewe.

Nyuma yo kunyagira Rugende FC ibitego 9-0 mu mukino wa 1/16 cy’igikombe cy’Amahoro, Umutoza wa Rayon Sports yavuze ko gutsinda ibitego byinshi byongerera abakinnyi icyizere ku buryo bishobora gutuma banitwara neza mu mukino wo ku wa Gatandatu na Rivers United.

Yagize ati “Abahungu nababwiye ko umukino w’uyu munsi uza kuduha ishusho y’uko tuzakina ku wa Gatandatu. Ntabwo ari kimwe ariko bizamura icyizere.”

Ku mpinduka zitandukanye yari yakoze, yavuze ko yagiraga ngo arebe bamwe mu bakinnyi nka Ange Mutsinzi, Nahimana Shasiir, Eric Irambona, Tidiane Kone bose ashobora kuzakenera mu mukino wa Rivers ndetse akaba yashakaga no guha amahirwe yo kwigaragaza abandi batajya babona umwanya wo gukina.

Abajijwe ku icyo asaba ubuyobozi n’abafana b’ikipe cyatuma atsinda Rivers United ikipe ye igakomeza mu matsinda, Masoudi yagize ati “Batube hafi. Nta magambo menshi dukeneye, batureke ariko batube hafi. Akantu dukeneye ni ka massage (kunanura imitsi), ka vitamini badufashe. Ni icyo tubasaba kuko tugiye mu magambo menshi, nta yo dushaka, dushaka ibikorwa.”

Ku cyizere aha abakunzi ba Rayon Sports cy’uko ikipe ye ishobora gutsinda ikanakomeza yagize ati “Icya mbere sindi Imana, icya kabiri ni uko dufite ubushobozi bwo gutsinda ariko tubikoreye. Nabo bashobora kudutsinda, ni umupira ariko reka ndeke kuvuga amambo menshi kuko si njyewe uzakina, ni abakinnyi bazakina. Reka dusabe Imana idufashe bya bindi turimo gutegura bizagende neza.”

Mu gihe Rayon Sports ikomeje kwitegura uko yazasezerera Rivers United, kapiteni wayo Austin Festus yasabye bagenzi be kutongera gukora amakosa yo kwirara nk’uko byagenze mu kwezi gushize ubwo batsindaga mu rugo Al-Merreikh yo muri Sudani ibitego bitatu ku busa bajya mu mukino wo kwishyura bakanyagirwa bine ku busa bagahita banasezererwa mu ijonjora rya nyuma rya CAF Champions League.

Yagize ati “Twishimiye impamba y’ibitego bibiri dufite kandi twizeye ko bitazongera kutugendekera nk’uko byagenze muri Sudani. Twigiye amasomo menshi ku byabaye hariya gusa twamaze kubyiyibagiza. Rayon Sports yaje ishaka kwica umukino wacu gusa twayeretse ko turi hejuru kandi simbona idutsinda mu mukino wo kwishyura.”

Ikipe izakomeza muri izi zombi, izahita ibona itike yo kujya mu matsinda ndetse ikazanahabwa akayabo k’amadorali ya Amerika ibihumbi 275 arenga gato miliyoni 222 mu mafaranga y’u Rwanda.

Biteganyijwe ko iyi kipe igera mu Rwanda saa tatu z’ijoro zo kuri uyu wa Kane tariki 20 Mata, kugira ngo ibone umwanya wo kumenyera ikirere no gukora imyitozo mbere y’umukino nyir’izina.

Masoudi yasabye abayobozi n'abafana ba Rayon Sports kutazana amagambo menshi muri iki gihe
Kapiteni wa Rivers United yasabye bagenzi be kutazakora amakosa bakoze muri Sudani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza