Nsanzimfura Keddy ashobora gutangwaho miliyoni 200 Frw n’ikipe yo muri Pologne

Yanditswe na Eric Tony Ukurikiyimfura
Kuya 24 Werurwe 2021 saa 11:17
Yasuwe :
0 0

Umukinnyi wa APR FC ukina hagati mu kibuga asatira izamu, Nsanzimfura Keddy, arifuzwa na Jagiellonia Białystok yo mu Cyiciro cya Mbere muri Pologne bivugwa ko ishobora kumutangaho agera kuri miliyoni 200 Frw.

Nsanzimfura Keddy w’imyaka 18, amaze umwaka muri APR FC nyuma yo kuyigeramo muri Nyakanga 2020, aguzwe muri Kiyovu Sports.

Uyu mukinnyi watsinze igitego APR FC yabonye muri Kenya ubwo yasezererwaga na Gor Mahia mu ijonjora ribanza rya CAF Champions League, yifuzwa n’ikipe ya Jagiellonia Białystok yo mu Cyiciro cya Mbere muri Pologne.

Amakuru IGIHE yamenye ni uko iyi kipe yatangiye kuvugana na APR FC ndetse nta gihindutse yiteguye kwishyura ibihumbi 200€ (miliyoni 200 Frw) kuri Nsanzimfura Keddy .

Nsanzimfura yari Kapiteni w’Ikipe y’Igihugu y’Abatarengeje imyaka 17 yitabiriye imikino yo gushaka Igikombe cya Afurika cya 2019, yabereye muri Tanzania mu 2018 ndetse ari mu bakinnyi bagaragaza ko bafite impano yihariye.

Yabaye umukinnyi wa kabiri uvuzwe mu makipe y’i Burayi nyuma ya Byiringiro Lague watumweho na FC Zurich yo mu Busuwisi hagati ya tariki ya 9 n’iya 19 Mata 2021.

Bivugwa ko Mupenzi Eto’o ushinzwe igura n’igurisha ry’abakinnyi muri APR FC ari ku Mugabane w’u Burayi ndetse ari we ushakira amakipe aba bakinnyi.

Ikipe ya Jagiellonia yo mu gace ka Białystok muri Pologne, imaze imyaka 100 ishinzwe ndetse iri mu makipe akomeye muri icyo gihugu kuko ijya ikina Europa League.

Muri uyu mwaka w’imikino wa 2019/20, iri ku mwanya wa 12 mu makipe 16, ifite amanota 28 mu mikino 22 imaze gukinwa.

Nsanzimfura Keddy na Byiringiro Lague bishimira igitego APR FC yatsinze Gor Mahia muri Kenya
Umutoza wa APR FC, Adil Mohamed Erradi, yishimiye Nsanzimfura Keddy ubwo yasinyishwaga muri Nyakanga 2020
Nsanzimfura w'imyaka 18, yageze muri APR FC avuye muri Kiyovu Sports
Jagiellonia Białystok yo mu Cyiciro cya Mbere muri Pologne ishobora kwishyura miliyoni 200 Frw kuri Nsanzimfura
Nsanzimfura yari Kapiteni w'Amavubi U-17 mu 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .