Njyanama y’Umujyi wa Kigali ni yo ifite ijambo rya nyuma ku kwihuza kwa Kiyovu Sports na AS Kigali

Yanditswe na Eric Tony Ukurikiyimfura
Kuya 20 Kamena 2019 saa 12:34
Yasuwe :
0 0

Umuyobozi w’Umujyi wa Kigali wungirije ushinzwe iterambere ry’ubukungu, Busabizwa Parfait, yavuze ko umwanzuro ku cyifuzo cyo kwihuza kw’amakipe ya Kiyovu Sports na AS Kigali uzafatwa na Njyanama y’Umujyi wa Kigali yayishyize iyi kipe y’umujyi mu 2012.

Tariki ya 25 Gicurasi nibwo ubuyobozi w’amakipe ya AS Kigali na Kiyovu Sports bwandikiye ubw’Umujyi wa Kigali busaba ko bwakwemererwa kwihuza, amakipe yombi agakora imwe dore ko yose afashwa n’uturere tw’Umujyi wa Kigali.

Mu kiganiro Umuyobozi w’Umujyi wa Kigali wungirije ushinzwe iterambere ry’ubukungu, Busabizwa Parfait, yagiranye n’abanyamakuru kuri uyu wa Kane, yemeje ko bakiriye iyi baruwa tariki ya 27 Gicurasi, isinyweho n’abayobozi b’amakipe yombi ariko umwanzuro uzafatwa n’Inama Nyanama y’Umujyi.

Ati” Icyemezo cya Njyanama y’Umujyi wa Kigali cyo mu 2012 ni cyo cyashyizeho AS Kigali y’abahungu n’iy’abakobwa ndetse n’itorero Indatirwabahizi. Bivuze ko n’icyemezo gihindura uko AS Kigali ibaho kizafatwa na Njyanama.”

Umuyobozi w’Umujyi wa Kigali yakomeje avuga ko uburyo ikipe nshya yabaho byose bizigwaho nyuma y’icyemezo kizafatwa na Njyanama, aho ishobora gufata umwanzuro muri Nyakanga.

Uyu muyobozi avuga ko ari icyemezo gisaba kubanza kwitonda kuko amakipe yombi asanzwe afite ubuzima gatozi ndetse kugira ngo hakorwe ikipe imwe hari abakinnyi n’abatoza byaba ngombwa ko basezererwa.

AS Kigali imaze imyaka 13 ishinzwe nyuma yo kwihuza kwa Renaissance FC na Kigali FC mu 2006, ikaba imaze kwegukana igikombe kimwe cy’Amahoro mu 2013.

Kiyovu Sports yo imaze imyaka 58 ibayeho nyuma yo kwemezwa n’iteka rya minisitiri mu 1961 ndetse imaze kwegukana shampiyona y’u Rwanda inshuro eshanu zirimo iyo mu 1990 yatwaye idatsinzwe. Iyi kipe ifite kandi ibikombe bitatu by’igihugu, aho icya nyuma igiheruka mu 1993 ubwo yanatwaraga shampiyona.

Mu ngengo y’imari ya 2018/19, Umujyi wa Kigali wari wageneye AS Kigali miliyoni 315 Frw mu gihe Akarere ka Nyarugenge kari gasanzwe kagenera Kiyovu Sports miliyoni 40 Frw buri mwaka w’imikino.

Umuyobozi w'Umujyi wa Kigali wungirije ushinzwe iterambere ry'ubukungu, Busabizwa Parfait, mu kiganiro n'abanyamakuru yavuze ko igitekerezo cy'amakipe yombi bacyakiriye
Umuyobozi w'Umujyi wa Kigali wungirije yavuze ko icyemezo cya nyuma kizafatwa na Njyanama y'Umujyi

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza