00:00:00 IGIHE NETWORK KN KINYARWANDA EN ENGLISH FR FRANCAIS

Niyonzima Haruna ku rutonde rw’abakinnyi b’ibihe byose bakinnye imikino 100 izwi na FIFA

Yanditswe na Eric Tony Ukurikiyimfura
Kuya 9 Ugushyingo 2021 saa 07:41
Yasuwe :
0 0

Kapiteni w’Ikipe y’Igihugu ‘Amavubi’, Niyonzima Haruna, ni we Munyarwanda rukumbi uri ku rutonde rw’abakinnyi b’ibihe byose babashije gukinira ibihugu byabo byibuze imikino 100 izwi n’Ishyirahamwe ry’Umupira w’Amaguru ku Isi "FIFA Century Club".

Urutonde rwakozwe na FIFA tariki ya 1 Ugushyingo 2021 rugaragaraho abakinnyi batandukanye bakiniye ibihugu byabo byibuze imikino 100 barimo n’abasezeye gukina umupira w’amaguru.

Kapiteni w’Amavubi, Niyonzima Haruna watangiye gukinira Amavubi mu 2006, ni we mukinnyi rukumbi w’Umunyarwanda uri kuri uru rutonde.

Haruna amaze gukinira Ikipe y’Igihugu imikino 104 kuva ku mukino wa mbere ubwo u Rwanda rwahuraga na Somalia muri CECAFA ku wa 27 Ugushyingo 2006.

Uyu mukinnyi FIFA igaragaza ko yavutse mu 1990, yagaragaye mu mikino ine u Rwanda rumaze gukina mu gushaka itike y’Igikombe cy’Isi cya 2022 mu gihe kandi yongeye guhamagarwa mu ikipe yitegura guhura na Mali na Kenya muri iki cyumweru, tariki ya 11 n’iya 14 Ugushyingo 2021.

Imikino FIFA yabaze kuri uru rutonde irimo iyo gushaka itike y’Igikombe cy’Isi, iyo gushaka itike y’Igikombe cya Afurika, iyo gushaka itike y’Imikino Olempike n’imikino ya gicuti izwi n’uru rwego ruyobora umupira w’amaguru ku Isi.

Umunya-Tunisia Jaidi Radhi wakiniye igihugu cye bwa mbere gihura n’u Rwanda mu 1996 n’Abanya-Côte d’Ivoire Siaka Tiene na Didier Zokora babikoze mu 2000, na bo bari kuri uru rutonde rw’abagejeje ku mikino 100 mpuzamahanga.

Niyonzima Haruna ni we mukinnyi w'Umunyarwanda umaze gukinira Ikipe y'Igihugu imikino 100
Niyonzima wongeye guhamagarwa, aracyafite amahirwe yo kongera imikino akinira Amavubi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .