00:00:00 IGIHE NETWORK KN KINYARWANDA EN ENGLISH FR FRANCAIS

Ni Manchester City cyangwa ni Chelsea? Ibyo wamenya ku mukino wa nyuma wa UEFA Champions League

Yanditswe na Eric Tony Ukurikiyimfura
Kuya 29 Gicurasi 2021 saa 03:31
Yasuwe :
0 0

Kuri uyu wa Gatandatu guhera saa tatu z’ijoro hateganyijwe umukino wa nyuma wa UEFA Champions League uhuza Chelsea na Manchester City zo mu Bwongereza.

Uyu mukino wa nyuma w’irushanwa rihuza amakipe yabaye aya mbere iwayo i Burayi, wagombaga kubera kuri Stade Ataturk Olympic yo muri Turikiya, ariko wimurirwa kuri Estádio de Dragão yo muri Portugal kubera ingamba zo kwirinda COVID-19.

Portugal ni kimwe mu bihugu biri ku rutonde u Bwongereza bwemerera abantu bakigiyemo kugaruka batanyuze mu kato mu gihe Turikiya yo itarimo.

Ni ku nshuro ya kabiri yikurikiranya umukino wa nyuma wa UEFA Champions League ugiye kubera muri Portugal, ni nyuma y’uko mu mwaka ushize wabereye i Lisbon.

Estádio de Dragão yakiriye umukino wa nyuma w’irushanwa rya UEFA Nations League mu 2019, yubatswe ubwo habaga Igikombe cy’u Burayi mu 2004.

Manchester City irakina na Chelsea ku mukino wa nyuma, yigeze gukinira kuri iki kibuga muri uyu mwaka w’imikino ubwo yanganyaga na FC Porto ubusa ku busa mu matsinda yakinwe mu Ukuboza 2020.

Chelsea nayo yahuye na FC Porto mu rugendo rugana ku mukino wa nyuma, ariko imikino yombi ya ¼ yabaye muri Mata, yakiniwe kuri Stade Ramon Sanchez Pizjuan yo muri Espagne kubera ko ingendo zari ikibazo hagati ya Portugal n’u Bwongereza mbere y’uko iki kibazo gikemurwa ku wa 17 Gicurasi.

Mu gihe umukino wa nyuma wa Champions League mu mwaka ushize, wabereye mu muhezo i Lisbon, kuri iyi nshuro muri Estádio de Dragão hemewe abafana 16.500 barimo 6000 kuri buri kipe nubwo Chelsea hari amatike asaga 800 yasubije nyuma yo kudacuruzwa.

Manchester City itegereje kwegukana iri rushanwa bwa mbere

Mu gihe Chelsea yegukanye UEFA Champions League mu 2012 itsinze Bayern Munich, Manchester City ifite igikombe cya Premier League cy’uyu mwaka, ni ubwa mbere igeze ku mukino wa nyuma.

Muri uyu mwaka w’imikino wa 2020/21, Chelsea yatsinze Manchester City inshuro ebyiri muri Shampiyona na FA Cup.

Amakipe yombi araba afite abakinnyi bayo bose, gusa Ilkay Gundogan wa Manchester City yagize imvune idakanganye mu myitozo yo ku wa Gatanu ubwo yagonganaga na Fernandinho.

Umutoza Pep Guardiola, yavuze ko ataza gusaba byinshi abakinnyi be kuri uyu wa Gatandatu kuko bazi ibyo bagomba gukina.

Ati “Nzi uburyo dushaka gukina n’uwo tugiye gukina na we kandi ntabwo ndi bugore abakinnyi banjye cyane. Ndabizi ko bidusaba kwitanga kugira ngo twegukane igikombe.”

Guardiola arashaka kwegukana UEFA Champions League ku nshuro ya gatatu nyuma yo kuyitwara inshuro ebyiri ari muri FC Barcelone mu 2009 na 2011.

Ku ruhande rwa mugenzi we wa Chelsea, Thomas Tuchel, arashaka kwegukana iri rushanwa bwa mbere nyuma yo kugeza Paris Saint-Germain ku mukino wa nyuma mu mwaka ushize w’imikino, ariko agatsindwa na Bayern Munich igitego 1-0.

Yagize ati “Mfite icyizere cyose ko buri wese ashaka igikombe, inyota tugaragaza mu kibuga ni yo igaragaza ko tugikwiye. Buri gihe biragorana gukina na City, Bayern cyangwa FC Barcelone iyo zitozwa na Pep kuko hari uburyo yubatsemo umukino we.”

Uyu mukino wa nyuma ushobora kugera mu minota 30 y’inyongera cyangwa penaliti mu gihe amakipe yombi yakomeza kunganya.

Buri kipe iraba yemerewe gusimbuza abakinnyi batanu ndetse n’uwa gatandatu mu gihe byaba ngombwa ko hakinwa iminota 30 y’inyongera.

Harakoreshwa ikoranabuhanga ryifashishwa mu misifurire [Video Assistant Referee, VAR] mu gihe Manchester City ari yo kipe iba imeze nk’iri mu rugo, bivuze ko yambara amabara yayo asanzwe y’ubururu bw’ikirere n’umweru.

Ni ku nshuro ya gatatu amakipe yo mu Bwongereza ahuriye ku mukino wa nyuma wa Champions League nyuma ya 2008 ubwo Manchester United yatsindaga Chelsea kuri penaliti 6-5 nyuma yo kunganya igitego 1-1 no mu 2019 ubwo Liverpool yatsindaga Tottenham ibitego 2-0.

Mu gihe Manchester City yatwara iki gikombe, iraba ikipe ya gatandatu yo mu Bwongereza yegukanye UEFA Champions League nyuma ya Liverpool, Manchester United, Nottingham Forest, Chelsea na Aston Villa.

City ni ikipe ya cyenda yo mu Bwongereza yageze ku mukino wa nyuma w’iri rushanwa nyuma ya Liverpool, Manchester United, Nottingham Forest, Chelsea, Aston Villa, Leeds United, Arsenal na Tottenham.

Ikipe yo mu Bwongereza iheruka kwegukana iri rushanwa ikinnye umukino wa nyuma bwa mbere ni Aston Villa yabikoze mu 1982 ubwo yatsindaga Bayern Munich.

Myugariro wa Chelsea, Thiago Silva, wari muri PSG yakinnye umukino wa nyuma mu mwaka ushize, ashobora kuba umukinnyi wa gatanu uwukinnye inshuro zikurikiranya mu makipe atandukanye, nyuma ya Marcel Desailly (1993 Marseille, 1994 Milan), Paulo Sousa (1996 Juventus, 1997 Borussia Dortmund), Samuel Eto’o (2009 Barcelona, 2010 Inter Milan) na Alvaro Morata (2014 Real Madrid, 2015 Juventus).

Chelsea na Manchester City zirahurira mu mukino wa nyuma wa UEFA Champions League kuri uyu wa Gatandatu
İlkay Gündoğan yagize imvune idakanganye mu myitozo yo ku wa Gatanu
Thomas Tuchel na Pep Guardiola bagiye kongera guhangana nyuma y'uko Chelsea yatsinze Manchester City muri Premier League
Ni ubwa mbere Manchester City igiye gukina umukino wa nyuma wa UEFA Champions League mu gihe Chelsea yatwaye iri rushanwa mu 2012

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .