00:00:00 IGIHE NETWORK KN KINYARWANDA EN ENGLISH FR FRANCAIS

Ni APR cyangwa ni AS Kigali?, icyo imibare ivuga mbere y’isozwa rya shampiyona

Yanditswe na Habimana Sadi
Kuya 19 Kamena 2021 saa 08:59
Yasuwe :
0 0

Mbere yo gukina imikino ibiri isoza shampiyona, imibare igaragaza ko hagati ya APR FC na AS Kigali FC imwe itegukana igikombe indi ikaba iya kabiri. Nanubu nta kipe irarekura.

Ikipe zombi zimaze gukina imikino itanu muri irindwi buri imwe igomba gukina, cyane ko izi zombi ziri mu makipe umunani ahataniye igikombe cya shampiyona.

Imikino AS Kigali FC yakinnye n’uko yarangiye:

AS Kigali FC 3-1 Rayon Sports FC (ibitego 2 izigamye)
AS Kigali FC 1-1 APR FC
AS Kigali FC 4-0 Espoir FC (ibitego 6 izigamye)
Marines FC 0-1 AS Kigali FC (ibitego 7 izigamye)
Rutsiro FC 0-2 AS Kigali FC (ibitego 9 izigamye)

Ni ukuvuga ngo iyi kipe y’Umujyi wa Kigali yinjije ibitego 11 yo yinjizwa bibiri gusa.

Imikino APR FC yakinnye n’uko yarangiye:

Rayon Sports FC 0-1 APR FC (igitego kimwe izigamye)
AS Kigali FC 1-1 APR FC
APR FC 3-0 Police FC (ibitego 4 izigamye)
APR FC 1-0 Espoir FC (ibitego 5 izigamye)
Bugesera FC 0-3 APR FC (ibitego 8 izigamye)

Bisobanuye ko iyi kipe y’Ingabo mu mikino itanu yakinnye, yinjije ibitego icyenda yo yinjizwa igitego kimwe gusa. Ubwo izigamye ibitego umunani.

AS Kigali FC isigaje gusura Bugesera FC kuri uyu wa Gatandatu, ikazasoreza kuri Police FC. Mu gihe APR FC isigaje kwakira Marines FC, ikazasoreza kuri Rutsiro FC.

Kugira ngo AS Kigali FC ibe yakwegukana igikombe cya shampiyona, irasabwa gutsinda imikino yayo yombi isigaje, kandi ikongera umubare w’ibitego kugira ngo itegereze ibiva mu mikino ya APR FC. Mu gihe APR FC kugira ngo ibashe kwegukana igikombe cya shampiyona biyisaba kubanza gushimangira intsinzi mu mikino ibiri isigaje ariko bikajyana no gutsinda ibitego byinshi byayidasha guca ku kipe y’Umujyi wa Kigali.

Muri uyu mwaka w’imikino 2020-2021 ikipe ya AS Kigali FC yagaragaje ko ishobora kwegukana igikombe cya shampiyona, ariko bikajyana n’uko ari shampiyona yakinwe mu buryo budasanzwe bw’amatsinda. Mu gihe iyi kipe yaba ibashije kubigeraho, yaba ari inshuro yayo ya mbere yegukanye igikombe cya shampiyona. Mu gihe APR FC niramuka yagukanye iki gikombe kizaba kibaye icya 19 cya shampiyona.

Ku ruhande rwa AS Kigali FC, Hussein Shaban Tchabalala ni we umaze gutsinda ibitego byinshi (9) mu gihe Mugunga Yves ari we umaze gutsindira APR FC ibitego byinshi (4).

AS Kigali FC nta kosa igomba gukora mu mikino ibiri isigaranye
APR FC irasabwa gutsinda imikino yayo ibiri ariko ikinjiza ibitego byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .