Ngwabije yafashije ikipe ye gusezerera Olympique de Marseille: Uko abanyarwanda bakina hanze bitwaye

Yanditswe na Ngabo Roben
Kuya 7 Mutarama 2019 saa 10:41
Yasuwe :
0 0

Mu mpera z’icyumweru dusoje abakinnyi babiri b’abanyarwanda bakina hanze batsindiye amakipe yabo ni Tuyisenge Jacques wa Gor Mahia FC na Bryan-Clovis Ngwabije watsindiye ikipe ye ASF Andrézieux igasezerera Olympique de Marseille mu gikombe cy’igihugu mu Bufaransa.

IGIHE yakusanyije umusaruro w’abakinnyi bose b’abanyarwanda bageze mu kibuga mu mpera z’iki cyumweru aho bakina mu bihugu bitandukanye ku Isi.

Benshi ntabwo amakipe yabo yakinnye kuko hari ibihugu bikiri mu biruhuko by’iminsi mikuru, nko mu Bubiligi kwa Bizimana Djihad na Nirisarike Salomon, muri Afurika y’Epfo ahakina Olivier Kwizera no muri Tunisia habarizwa Biramahirwe Christopher Abeddy na Nshuti Innocent.

Meddie Kagere na Haruna Niyonzima

Mu mpera z’icyumweru gishize muri Tanzania hakinwe irushanwa ry’igikombe cy’igihugu bita ‘Mapinduzi Cup’.

Ikipe ya Simba Sports Club ifite abanyarwanda babiri yanyagiye Chipukizi FC yo muri Zanzibar 4-1 birimo bibiri bya Meddie Kagere. Uyu mukino wabaye ku wa Gatandatu tariki 5 Mutarama 2019 na kapiteni w’Amavubi Haruna Niyonzima yawugaragayemo.

Emery Mvuyekure na Muzerwa Amini batsinze Kayumba Soter

Ku wa Gatandatu tariki 5 Mutarama 2019, Tusker FC yo muri Kenya ifite abanyarwanda babiri barimo Umunyezamu Emery Mvuyekure na rutahizamu Amini Muzerwa yatsinze Sofapaka 3-2 mu mukino wabereye kuri Kenyatta Stadium mu Mujyi wa Machakos.

Sofapaka FC yatsinzwe yo yari irimo Kayumba Soter nubwo isanganywe undi munyarwanda, Mico Justin ariko we ntabwo yakinnye kubera ikibazo cy’imvune.

Mugabo Gabriel

Myugariro wakiniye amakipe atandukanye mu Rwanda arimo Marines FC, Mukura VS, Police FC na Rayon Sports, Gabriel Mugabo, ntabwo ikipe ye KCB SC ihagaze neza kuko kuri iki Cyumweru tariki 6 Mutarama 2019 yanganyije na Kariobangi Sharks 1-1 bituma iguma mu myanya ya nyuma.

KCB SC ya Mugabo iri ku mwanya wa 17 mu makipe 18 akina shampiyona y’icyiciro cya mbere muri Kenya n’amanota abiri gusa mu mikino itandatu imaze gukina.

Ndayishimiye Eric ‘Bakame’
Bakame ntabwo yashoboye gutahana amanota atatu kuko AFC Leopards akinira yanganyije na Nzoia Sugar FC 1-1 mu mukino yakinnye iminota 90 bituma ikipe ye iguma ku mwanya wa 10 muri shampiyona n’amanota arindwi, irushwa arindwi na Mathare United iyoboye urutonde kuko yo ifite 14.

Jacques Tuyisenge

Uyu rutahizamu yongeye kunyeganyeza inshundura ku mukino wa mbere yakinnye mu 2019 ubwo Gor Mahia ye yanganyaga na Mathare United iyoboye urutonde rwa shampiyona 1-1. Igitego cyahaye ikipe ye inota rimwe ni we wagitsinze.

Gor Mahia FC iri ku mwanya wa munani n’amanota arindwi n’umukino w’ikirarane kuko yo imaze gukina imikino itanu aho kuba itandatu nk’andi makipe.

Kévin Monnet-Paquet

Uyu rutahizamu w’imyaka 30 uherutse gusaba guhamagarwa mu ikipe y’igihugu y’u Rwanda, ntabwo yari mu bakinnyi 18 umutoza Jean-Louis Gasset yakoresheje mu mukino w’igikombe cy’igihugu banyagiyemo 6-0 Olympique Strasbourg yo mu cyiciro cya kabiri mu Bufaransa.

Monnet-Paquet usanzwe uba mu bakinnyi 11 babanza mu kibuga yari yaruhukijwe.

Bryan-Clovis Ngwabije

Ntabwo abayobora umupira w’amaguru mu Rwanda cyangwa abatoza b’ikipe y’igihugu baregera umuryango wa Bryan-Clovis Ngwabije ariko ni myugariro w’imyaka 20 gusa wavukiye mu Bufaransa ku babyeyi b’abanyarwanda.

Ngwabije kuri iki Cyumweru yafashije ikipe ye ASF Andrézieux yo mu cyiciro cya kane gusezerera Olympique de Marseille mu gikombe cy’igihugu, bayitsinze 2-0 aho ariwe wafunguye amazamu ku munota wa 17 gusa.

Bryan-Clovis Ngwabije afite imyaka 20 gusa kandi avuka ku babyeyi bombi b'abanyarwanda
Myugariro Ngwabije yatsinze kimwe mu bitego byasezereye Marseille
Ikipe ya Bakame ntabwo ihagaze neza muri Shampiyona ya Kenya
Jacques Tuyisenge yishimira igitego yatsinze Mathare United
Tusker FC ya Mvuyekure yabonye amanota atatu imbere ya Sofapaka FC ya Kayumba Soter

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza