Kwamamaza

Ababyeyi basabwe guha uburenganzira abana b’abakobwa bifuza gukina umupira w’amaguru

Yanditswe kuya 27-08-2016 saa 07:17' na Manzi Rema Jules


Umuyobozi ushinzwe umupira w’amaguru w’abagore mu Ishyirahamwe ry’umupira w’amaguru mu Rwanda, Ferwafa, Rwemalika Félicité yasabye ababyeyi kureka umuco wo gukumira abana b’abakobwa gukina umupira w’amaguru kuko ubafasha kugira ubuzima bwiza.

Mu Rwanda rimwe na rimwe usanga ababyeyi, baha agaciro abana b’abahungu mu mikino itandukanye abakobwa bagahezwa kandi na bo bishobora kubateza imbere.

Rwemalika yabitangaje mu muhango wo gutangiza gahunda ya “Live Your Goals Grassroots Festival” igamije gushishikariza abana b’abakobwa gukura bakunda umupira w’amaguru mu Karere ka Bugesera.

Iyi gahunda u Rwanda rwayitewemo inkunga y’ibihumbi 120$ (97 200 000frw) n’Ishyirahamwe ry’umupira w’amaguru ku Isi,FIFA.

Uyu mushinga wabaye umwe muri itandatu ku Isi yashimwe na FIFA ikemera no kuwutera inkunga, watangiye muri uku kwezi utangirira mu Karere ka Huye ukazamara imyaka itatu bikaba byitezwe ko uzasigira u Rwanda amakipe y’igihugu mu byiciro by’abari munsi y’imyaka 9, 12 na 15 nk’uko Rwemalika abitangaza.

Yagize ati “Iki ni igikorwa kiza kuko kubona abana 400 b’abakobwa bashaka gukina umupira w’amaguru n’abandi barenga 200 baje kubashyigikira. Ni ikintu gishimishije cyane kandi kigaragaza impinduka zimaze kuba mu muco nyarwanda kuba bareka umwana w’umukobwa agakina umupira nka musaza we. Ni umushinga Ferwafa yatewemo inkunga na FIFA ariko ntushobora kugerwaho tudafatanyije n’ababyeyi n’abayobozi b’ibigo by’amashuri.”

Yakomeje avuga ko uyu mushinga kuba wibanda ku bana bari hagati y’imyaka 6 na 12,bitavuze ko abandi bibagiranye ahubwo bahisemo icyo cyiciro kuko bashaka kubaka bahereye hasi nyuma yo gusanga abenshi batangira gukina bamaze gukura bikagorana ko bagera ku rwego rwo hejuru ku buryo umupira wanababyarira umusaruro ufatika.

Akarere ka Bugesera kari aka kane gakorewemo iyi gahunda nyuma ya Huye, Rusizi na Nyagatare aha hose hakaba haragiye hahurizwa abana b’abakobwa bagashishikarizwa gukunda umupira w’amaguru.

Abashinzwe imikino ku bigo na bo bahawe amahugurwa ku buryo bagomba gukurikirana izo mpano ndetse bagahabwa ibikoresho birimo imipira yo gukina izabafasha.

Tariki 9 Nzeli uyu mushinga uzakomereza mu Karere ka Rubavu kazwiho kuba karazamuye impano z’abakinnyi bakomeye mu cyiciro cy’abahungu harimo n’abagenderwaho mu ikipe y’igihugu noneho itsinda ryabihuguriwe ririmo umwalimu w’abatoza, Rutsindura Antoine, Rwemalika Félicité n’umuyobozi wa tekinike muri Ferwafa, Hendrik Pieter de Jongh bakazajya guhugura abazafasha abana b’abakobwa kugira ngo bareke gusigara inyuma.

Iki gikorwa cyitabiriwe n'abana bagera kuri 400
Hendrik Pieter de Jongh, Rwemalika Félicité na Mukandanga Kelly bashinzwe ruhago y'abagore murir Ferwafa
Abana b'abakobwa beretswe akamaro ko gukina umupira ndetse abenshi bagaragaza ko babyishimiye
Rwemalika yasabye ko abakobwa babona uburenganzira bwo gukina umupira w'amaguru nka basaza babo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved