Ndoli utarasezera mu Amavubi yavuze umunyezamu mwiza hagati ya Kwizera na Mvuyekure n’icyizere aha Mashami

Yanditswe na Eric Tony Ukurikiyimfura
Kuya 30 Werurwe 2021 saa 07:20
Yasuwe :
0 0

Umunyezamu wa Musanze FC, Ndoli Jean Claude, yavuze ko agifite imbaraga zo gukina ndetse atarasezera mu Ikipe y’Igihugu mu gihe yemeza ko nubwo Mvuyekure Emery yitwaye neza ku mukino wa Mozambique, ariko Kwizera Olivier ari we ukwiye kubanza mu kibuga.

Ndoli Jean Claude w’imyaka 35 ni umwe mu bakinnyi bakiniye Amavubi imikino myinshi kuva mu 2004.

Nubwo amaze igihe adahamagarwa ndetse bamwe bakavuga ko atagifite umwanya mu Ikipe y’Igihugu, we yemeza ko atarasezera ndetse ateganya kuzagira uburyo bwihariye abikoramo.

Ati “Imbaraga ziracyahari, umwanya umuntu aba akinaho umwemerera imyaka iyo ariyo yose. Bitewe n’aho imyaka igeze ndumva naharira barumuna banjye kuko njye ndimo ndasoza.”

Yakomeje agira ati “Ndashaka kuzasezera mu buryo buzwi bwemewe ku buryo habaho n’umukino rusange nkasezera neza. Sindasezera burundu, ariko igihe nzasezerera ndashaka gutegura ibirori bito bizangaragariza ba bakunzi banjye ko koko bakimfite ku mutima, ko dushobora no kubana mu bundi buzima hanze y’umupira.”

“Sinkishaka kuvuga ngo ngiye kurwanira umwanya mu Ikipe y’Igihugu, sinshaka kuvuga ngo ngiye kubangamira barumuna banjye bakure badatekanye, oya.”

Kwizera Olivier ni we munyezamu wa mbere

Ku bwa Ndoli Jean Claude, we avuga ko nubwo Mvuyekure Emery yitwaye neza ku mukino wa Mozambique, ariko Kwizera Olivier afite umwihariko umugira nimero ya mbere mu Amavubi.

Ati “[ Mu izamu] ni igice koko kiri gutanga icyizere, nkunda kubivuga, burya ikipe nziza ni iba ifite umunyezamu mwiza. Ejo bundi mwarabibonye ko twahuye n’ikibazo, Olivier [Kwizera] yari afite ikarita itukura, ntiyabashije gukina, ariko na Emery [Mvuyekure] uburyo yitwaye byaradushimishije nk’Abanyarwanda.”

Yakomeje agira ati “Twabonye ugomba kubanzamo, dufite n’umusimbura ushobora kudufasha. Ariko mu by’ukuri, urebye muri rusange Olivier Kwizera ni we ukwiye gukinira Ikipe y’Igihugu ‘Amavubi’ bitewe n’uko yujuje byose. Ku bazamu hari byinshi tureba, hari ugutangiza umukino, ikindi Olivier nta bwoba agira.”

Ndoli asanga Mashami akwiye gutoza Amavubi

Umunyezamu wa Musanze FC yavuze ko Mashami Vincent wamubereye umutoza agikinira APR FC, akwiye gutoza Amavubi kuko abakinnyi bayakinira ubu abenshi yabatoje bakiri bato.

Ati “Ikipe y’Igihugu yacu imeze neza bitewe n’umutoza, abakinnyi bayirimo ubu, umutoza yabanye nabo. Yabanye nabo kuva mu bwana bwabo kugeza bakuze kuko ni abakinnyi yagiye atoza ahantu hatandukanye, haba muri APR, haba mu Isonga, ni abakinnyi azi.”

“Turi kubona ko ibyiza abaziho abibyaza umusaruro kuko abizi bitewe n’umusaruro w’ubushize duhereye no muri CHAN ku mukino twakinnye na Togo na n’ubu ku mukino twakinnye ejo bundi na Mozambique. Ni ibintu biduha icyizere cyane ko dufite ikipe nziza kandi iragerageza gutsinda.”

Ndoli Jean Claude yizeye ko Amavubi ashobora kwitwara neza mu mukino afitanye na Cameroun kuri uyu wa Kabiri saa tatu z’ijoro, akaba yabona itike y’Igikombe cya Afurika cya 2021.

Uyu munyezamu yamenyekanye cyane akinira Police FC guhera mu 2003, imyaka ibiri mbere y’uko agurwa na APR FC yakiniye imyaka 11, ayifasha kwegukana ibikombe birimo bibiri bya CECAFA Kagame Cup n’icyenda bya Shampiyona.

Mu mwaka w’imikino wa 2016/17, yakiniye AS Kigali mbere yo kujya muri Kiyovu Sports yavuyemo ajya muri Musanze FC mu 2019, aho afite amasezerano azarangirana n’uyu mwaka w’imikino.

Mvuyekure Emery (ibumoso), Ndayishimiye Eric 'Bakame' (hagati) na Kwizera Olivier (iburyo) ni bo banyezamu Amavubi yajyanye muri Cameroun
Ndoli Jean Claude avuga ko Kwizera Olivier yujuje byose bituma aba umunyezamu wa mbere mu Amavubi
Mvuyekure Emery yitwaye neza ku mukino wa Mozambique
Umutoza w'abanyezamu b'Amavubi, Higiro Thomas (ibumoso) na Mashami Vincent (iburyo) bafite akazi gakomeye ko gutoranya ubanzamo hagati ya Mvuyekure na Kwizera bamaze iminsi bitwara neza
Ndoli Jean Claude amaze imyaka hafi 18 akina mu Cyiciro cya Mbere
Ndoli Jean Claude yagiye muri Musanze FC mu 2019, ku masezerano y'imyaka ibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .