Kwamamaza

Usengimana Faustin ukinira APR FC yavuze imyato umukobwa yihebeye

Yanditswe kuya 21-09-2016 saa 09:17' na Manzi Rema Jules


Myugariro w’Ikipe y’Igihugu, Amavubi na APR FC, Usengimana Faustin yashimiye by’umwihariko umukunzi we Bayingana Daniella nk’umwe mu bamuhora hafi, akamugira inama amubwira aho atitwaye neza ndetse n’uburyo bwo gutera imbere kurushaho.

Uyu myugariro n’umukunzi we Daniella bamaze igihe kinini bakundana ndetse bakunze kuba bari kumwe mu birori n’ahandi hatandukanye. Ku mikino, uyu mukobwa aba yagiye gushyigikira Usengimana.

Usengimana avuga ko Daniella ari umuntu ukomeye mu buzima bwe kuko amufasha muri byinshi yaba mu kumugira inama ku bijyanye n’iterambere rye no kumukosora aho yatannye.

Ati “Umukunzi wanjye icyo amfasha ni ukunshyigikira mu byo nkora no kuntera ingufu aho nacitse intege akanyereka ko aho bitakunze uyu munsi ko ejo bizagenda neza.”

Umwaka ushize w’imikino, Usengimana avuga ko wamururiye nk’umubirizi ku buryo yumva atifuza no kuwibuka, yiteguye kwigaragaza muri shampiyona ndetse ijisho arihanze ku “gikombe."

Ikipe y’Ingabo z’Igihugu n’ubwo yegukanye igikombe cya shampiyona mu mwaka ushize binayihesha itike yo kuzahagararira u Rwanda mu mikino ya Orange CAF Champions League, uyu myugariro yagaragaye mu mikino mike.

Usengimana Faustin avuga ko nta ruhare rugaragara yagize kuko igihe kinini yakimaze mu mvune ndetse n’igihe ari muzima ntagirirwe icyizere n’abatoza.

Nyuma y’aho abakinnyi bahanganiraga umwanya barimo Rwatubyaye Abdul na Emery Bayisenge bafashe icyemezo cyo kuva muri APR FC, Usengimana Faustin ubu ni myugariro wa mbere muri iyi kipe ndetse yahawe no kuba Kapiteni wungirije bituma amara igihe kinini yambaye igitambaro kuko Ngabo Albert usanzwe ari kapiteni akunze kubanza ku ntebe y’abasimbura.

Mu kiganiro cyihariye yagiranye na IGIHE, Usengimana yatangaje ko atajya yifuza kwibuka uko umwaka ushize wamugendekeye ahubwo ashyize ibitekerezo bye byose kuri shampiyona igiye gutangira.

Yagize ati “Umwaka ushize wagenze nabi ariko si uko nari meze nabi ntashoboye ahubwo nta mwanya nabonye wo gukina. Nagize ibihe bibi ntifuza no kwibuka ariko mugiye kubona Usengimana Faustin nyawe.’

"Uyu mwaka impamvu ubona ko naba meze neza ni uko wo nawutangiye nkina ariko no ku ruhande rwanjye narakoze cyane. Sinaciwe intege n’ibyambayeho muri kiriya gihe. Abakinnyi bagenzi banjye baramfashije, umutoza n’ikipe yose muri rusange imba inyuma, kandi nanjye ndifuza kubaha ibyo banyifuzaho.”

Ku bijyanye n’ibivugwa ko yaba agiye guhabwa ubukapiteni muri iyi kipe kuko Ngabo atakibona umwanya ubanzamo, yavuze ko atari byo kuko kapiteni ahari kandi amwubaha bikomeye.

Ati “Kapiteni ni Ngabo. Njye ndamwungirije, si ubwa mbere nambaye igitambaro kuko muri Rayon nabaye kapiteni no mu Mavubi U-17 nariwe. Biranshimisha kandi byongera imbaraga iyo ncyambaye. Ikindi mu gihe cyose nabaga nambaye igitambaro twatsinzwe kabiri gusa ikindi gihe cyose turatsinda. Gusa nubwo mbikunda ntibivuze kwishyira hejuru ya kapiteni wacu twese twubaha, ahubwo tuzakorana bya hafi kurushaho.”

Usengimana Faustin arashaka kugarukana imbaraga zidasanzwe
Usengimana Faustin (uwa kabiri uturutse ibumoso) niwe kapiteni wungirije muri APR FC
Umukobwa Usengimana yihebeye
Bombi bakunze kugaragara ahantu henshi bari kumwe

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved