Mvuyekure Emery yaherutse abandi bakinnyi kugera mu Amavubi (Amafoto)

Yanditswe na Eric Tony Ukurikiyimfura
Kuya 22 Werurwe 2021 saa 07:23
Yasuwe :
0 0

Umunyezamu Mpuzamahanga w’Umunyarwanda, Mvuyekure Emery, ukinira Tusker FC yo mu Cyiciro cya Mbere muri Kenya, yabaye umukinnyi wa nyuma ugeze mu mwiherero w’Amavubi ku Cyumweru, aho yagiye gufatanya na bagenzi be kwitegura imikino ya Mozambique na Cameroun.

U Rwanda ruzabanza kwakira Mozambique ku wa Gatatu tariki ya 24 Werurwe 2021 mbere y’uko rusura Cameroun ku wa 30 Werurwe mu mikino ibiri isoza iyo mu itsinda F ryo gushaka itike y’Igikombe cya Afurika cya 2021 kizaba mu ntangiriro z’umwaka utaha.

Umunyezamu Mvuyekure Emery ni we waherutse abandi bakinnyi bakina hanze mu kugera mu mwiherero w’Amavubi i Nyamata, aho yahageze ku Cyumweru ndetse biteganyijwe ko atangira gukora imyitozo kuri uyu wa Mbere, ibisubizo bya COVID-19 yafashwe nibigaragaza ko ari muzima.

Mvuyekure yatinze kwitabira ubutumire bw’Amavubi kubera umukino wa shampiyona ya Kenya, ikipe ye ya Tusker FC yanganyijemo na City Stars ibitego 2-2 ku wa Gatandatu.

Ni umwe mu bakinnyi batandatu bakina hanze umutoza Mashami Vincent azaba afite ku mukino wa Mozambique n’uwa Cameroun. Abandi ni Niyonzima Haruna na Kagere Meddie bakina muri Tanzania, Nirisarike Salomon ukina muri Armenia, Rubanguka Steve ukina mu Bugereki na Mukunzi Yannick ukina muri Suède.

Abandi babiri bahamagawe ariko ntibarekurwe n’amakipe yabo ni Rwatubyaye Abdul ukina muri Macedonia na Muhire Kevin ukina muri Oman.

Ikipe y’Igihugu ikomeje imyiteguro idafite Kimenyi Yves wasimbuwe na Rwabugiri Umar kubera imvune mu gihe Hakizimana Muhadjiri yarwaye COVID-19.

Mozambique izakina n’u Rwanda, biteganyijwe ko igera i Kigali mu gitondo cyo kuri uyu wa Mbere n’indege yihariye. Itsinda ry’abakinnyi 21 ni ryo rihaguruka i Maputo mu gihe abakina hanze bamwe bazasanga bagenzi babo i Kigali.

Mbere y’uko hakinwa imikino ibiri isigaye mu itsinda F, u Rwanda ni urwa nyuma n’amanota abiri. Mozambique na Cap-Vert binganya amanota ane mu gihe Cameroun izakira irushanwa ritaha, ifite amanota 10 ku mwanya wa mbere.

Mvuyekure Emery yageze mu mwiherero w'Amavubi ku Cyumweru
Umunyezamu wa Tusker FC muri Kenya, yari afite umukino ku wa Gatandatu
Mvuyekure apimwa umuriro kuri La Palisse Hotel ahacumbitse Amavubi
Emery Mvuyekure azahaganganira umwanya wo kubanza mu kibuga hamwe na Kwizera, Bakame na Rwabugiri

Amafoto: FERWAFA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .