00:00:00 IGIHE NETWORK KN KINYARWANDA EN ENGLISH FR FRANCAIS

Musanze FC yasinyishije umutoza w’Umunya-Kenya n’abakinnyi babiri b’abanyamahanga (Amafoto)

Yanditswe na Eric Tony Ukurikiyimfura
Kuya 7 Nzeri 2021 saa 07:23
Yasuwe :
0 0

Mu gitondo cyo kuri uyu wa 6 Nzeri 2021, ubuyobozi bwa Musanze FC bwerekanye umutoza mukuru mushya, Umunya-Kenya Frank Ouna, Nshimiyimana Maurice ‘Maso’ uzaba umwungirije n’abakinnyi babiri bashya b’abanyamahanga.

Mu myaka ibiri iri imbere, Musanze FC izatozwa n’Umunya-Kenya Frank Ouna Onyango uzaba yungirijwe na Nshimiyimana Maurice ‘Maso’ bombi beretswe itangazamakuru kuri uyu wa Mbere.

Frank Ouna wahawe akazi ko kuba umutoza mukuru, yatoje mu makipe ya Sofapaka FC na Gor Mahia nk’umutoza wungirije, muri Wazito United, KCB FC na Mathare United aherukamo nk’umutoza mukuru. Yabaye kandi mu Ikipe y’Igihugu ya Kenya nk’umutoza wungirije.

Mu kiganiro n’itangazamakuru, Perezida wa Musanze FC, Tuyishimire Placide ‘Trump’, yavuze ko impamvu bahisemo Frank Ouna ari uko ari umutoza ufite inararibonye muri uyu mwuga ndetse ku bufatanye n’abazamwungiriza, bazageza iyi kipe ku ntego ifite muri uyu mwaka ari yo kuzamura abakinnyi bakiri bato mu makipe y’abatarengeje imyaka 17 na 20 no gutwara igikombe.

Ati “Ni umutoza twatekereje, tumuganiraho bitewe n’abari basabye. Twari dufite urutonde rw’abatoza benshi hariho n’ab’i Burayi ariko twamuhisemo nk’umutoza ufite inararibonye ku mupira w’Abanyafurika bigendanye n’aho yanyuze mu myaka ishize kandi aho yatoje birabigaragaza.”

Yakomeje agira ati “Kurambagiza si ikintu cyoroshye ariko ibyo twashingiyeho ni ibifatika yagezeho, ibisigaye tuzabibona mu kibuga. Umupira w’amaguru si urugendo rw’umunsi umwe, habaho guhindura ingamba z’urugendo kandi twizeye ko hamwe n’umwungiriza we bazageza ikipe ku ntego twihaye.”

Musanze FC yerekanye kandi Nshimiyimana Maurice ‘Maso’ uzaba wungirije uyu mutoza mukuru. Ubuyobozi bwavuze ko bwamuhaye akazi bushingiye ku kuba ari umutoza umenyereye Shampiyona y’u Rwanda ndetse akaba yarigeze kuba muri Musanze FC ikitwara neza.

Maso wanyuze mu makipe arimo Police FC, Rayon Sports na Gasogi United, agiye kuba muri Musanze FC yigeze kubamo ubwo yari yungirije Umunya-Tanzania Baraka.

Musanze FC yasinyishije kandi inerekana rutahizamu Angua Eric Kanza ukomoka muri Repubulika Iharanira Demokarasi ya Congo, akaba yarakinnye muri Diables Noirs yo muri Congo Brazzaville.

Undi mukinnyi wasinye ni Umunya-Uganda Ben Ocen wavuye muri Police FC ya Uganda.

Agaruka kuri aba bakinnyi bombi, Tuyishimire Placide yavuze ko babatoranyije bifashishije abatoza kandi bizeye ko bazatanga umusaruro.

Ati “Abakinnyi bashya twazanye batoranyijwe n’umutoza mukuru afatanyije n’umutoza wungirije bo ubwabo. Twashatse kongera imbaraga mu busatirizi no hagati kugira ngo habeho uguhangana kugamije kuzamura urwego rw’abo dusanganywe.”

Aba bakinnyi bashya baje biyongera kuri Nshimiyimana Imran ukina hagati mu kibuga, wavuye muri Rayon sport ndetse na Nyirinkindi Saleh ukina asatira izamu, we wavuye muri Kiyovu Sports.

Frank Ouna yahawe amasezerano y'imyaka ibiri yo gutoza Musanze FC yo mu Majyaruguru
Nshimiyimana Maurice Maso yasubiye muri Musanze FC nk'umutoza wungirije
Ben Ocen wakinaga muri Police FC ya Uganda yasinyiye Musanze FC
Umunye-Congo Angua Eric Kanza ni umukinnyi mushya wa Musanze FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .