Kwamamaza

Muhadjili yahishuye amagambo Haruna yamubwiye mbere yo gutsinda igitego

Yanditswe kuya 5-09-2016 saa 11:21' na Manzi Rema Jules


Muhadjili Hakizimana watsinze igitego cyo kwishyura ku mukino wahuje u Rwanda na Ghana, amakipe yombi yanganyijemo 1-1 yatangaje amagambo mukuru we, Haruna Niyonzima yamubwiye mbere yo gutera Coup franc yavuyemo igitego.

Uyu mukino wa nyuma wo mu itsinda H mu guhatanira itike y’igikombe cya Afurika cya 2017 kizabera muri Gabon wabereye kuri Accra Sports Stadium ku mugoroba wo kuwa Gatandatu, tariki ya 3 Nzeli 2016.

Muhadjili yinjiye mu kibuga ku munota wa 67 asimbuye Sugira Ernest asanga u Rwanda rwatsinzwe igitego kimwe ku busa, rwagerageje ishoti rimwe rigana mu izamu rya Ghana naryo ryanyuze hejuru.

Mu minota 14 yari amaze guhindura umukino ndetse ku ikosa ryari rikorewe kuri Jacques Tuyisenge atsinda igitego cyo kwishyura kuri coup franc, cyatumye u Rwanda rutahukana ishema ntirwongera kunyagirirwa muri iki gihugu nk’uko byagenze 2003 rutsindwa 4-2 mu gushaka itike ya CAN 2004.

Nubwo ngo atari yagiriwe icyizere cyo kubanza mu kibuga, uyu mukinnyi kuri ubu ukinira APR FC ngo yiyumvagamo ko hari icyo yakora na mbere y’uko umutoza Jimmy Mulisa amusaba guhaguruka ngo atangire kwishyushya.

Akigera mu kibuga yakoresheje imbaraga zose atangira gushaka uko yagera imbere y’izamu rya Ghana nubwo bitari byoroshye kubera abakinnyi bakomeye cyane bari baririnze nka Harrison Afful ukinira Columbus Crew SC muri Amerika, Baba Rahman wa Schalke 04 mu Budage wari wazonze Amavubi cyane, Jonathan Mensah wa Anzhi Makhachkala mu Burusiya na Edwin Gyimah wa Orlando Pirates muri Afurika y’Epfo.

Ku munota wa 83, umukinnyi w’Amavubi, Tuyisenge Jacques yakoreweho ikosa umusifuzi atanga coup franc, yaje guterwa ndetse yinjizwa neza na Muhadjili.

Aganira na IGIHE, Muhadjili yatangaje ko bitewe n’uko yari yinjiye mu kibuga yumva yiyizeye 100%, coup franc ikimara kuboneka yabanje kuvugana n’abakinnyi bakomeye bashoboraga kuyitera barimo mukuru we kapiteni Haruna Niyonzima na Jacques Tuyisenge abasaba ko bamureka akayitera kuko yiyizeye kandi yumva afite ubushobozi bwo kuyitsinda.

Aba bakinnyi nta gushidikanya barabimwemereye ariko ahagaze ku mupira, Haruna aramubwira ati “Niba koko wumva wiyizeye shyira umutima hamwe urabikora.”

Ku ruhande rwa Haruna avuga ko kuba barahaye Muhadjili uburenganzira bwo gutera coup franc atari uko ari murumuna we ahubwo nka kapiteni kandi umaze imyaka myinshi mu kibuga, iyo umukinnyi yifitiye icyizere akanabivuga nta mpamvu yo kumubuza icyo yumva afitiye ubushobozi.

Yagize ati “Yadusabye ko ayitera akandi yumva yiyizeye turabimwemerera. Uretse na Muhadjili n’undi mukinnyi ufite ishyaka gutyo iyo aje asaba gutera penaliti cyangwa coup franc ndamureka kuko hari impamvu biba byamujemo. Twamweretse ko tumushyigikiye arayitera kandi koko ayibyaza umusaruro.”

Ni igitego cya mbere Muhadjili yari atsindiye Amavubi mu mukino mpuzamahanga ariko avuga ko kuba atangiye atsinda ikipe ikomeye nka Ghana ngo byamwongereye icyizere ko n’ikindi gihe yabikora.

Uyu mukinnyi ugiye gusubira muri APR FC mu irushanwa ryateguwe na AS Kigali ribanziriza shampiyona yavuze ko afite inyota nyinshi yo kwegukana ibikombe, akarushaho kwitwara neza ndetse hamwe no gukora cyane akaba yagera ku nzozi ze zo kujya gukina hanze y’Igihugu.

Inkuru bifitanye isano: Amavubi yakoze ibyo yasezeranyije Abanyarwanda, ahagama Ghana iwayo

Muhadjili Hakizimana ashyikirizwa indabyo ubwo ikipe y'Igihugu yageraga ku kibuga cy'indege i Kanombe
Haruna Niyonzima yishimiye uburyo murumuna yitwaye ku mukino wa Ghana
Muhadjili Hakizimana watsindiye Amavubi igitego cyo kwishyura ku mukino wa Ghana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved