Kwamamaza

Mu cyumweru kimwe, abantu 4000 bamaze kwiyandikisha nk’abakunzi ba Rayon Sports

Yanditswe kuya 5-10-2016 saa 12:05' na Manzi Rema Jules


Mu mushinga mushya ikipe ya Rayon Sports yatangije wo kubarura abakunzi bayo hirya no hino mu gihugu ndetse no hanze yacyo hakoreshejwe telefoni ngendanwa (bakanze *699#), abagera ku bihumbi bine ni bo bamaze kwiyandikisha mu cyumweru kimwe cy’igeragezwa.

Uyu mushinga wateguwe n’Ikompanyi yitwa TIT Africa, ugamije kwegeranya imibare nyayo y’abakunzi ba Rayon Sports aho bari hose kugira ngo ibe ari yo izajya igenderwaho mu gutegura imishinga yo guteza ikipe imbere itegurwa n’ubuyobozi, ku buryo buri mufana azagira icyiciro yishyiramo bitewe n’ubushobozi bwe n’inkunga yumva azajya atanga.

Umunyamabanga wa Rayon Sports, Gakwaya Olivier, yabwiye IGIHE ko mu cyumweru kimwe bari bamaze bareba uko umushinga uzajya ukora, basanze hamaze kwiyandikisha abakunzi ba Rayon Sports barenga ibihumbi bine, ibintu ngo bitanga icyizere ko mu gihe uzaba umaze kumurikwa ku mugaragaro imibare ishobora kuziyongera cyane kuko abakunda iyi kipe bawishimiye.

Ati “Ni umushinga ugamije ahanini kwerekana imibare ifatika y’abakunzi ba Rayon Sports atari bya bindi byo kuvuga ngo niyo ifite abafana benshi ariko nta mibare. Aha niho tuzajya duhera dutegura imishinga yo guteza imbere ikipe kuko tuzaba tuzi neza abafana n’ibyiciro byabo ku buryo buri wese atekerezwaho. Gusa utaziyandikisha na we ntabwo azongera kuvuga ngo ni umukunzi wa Rayon Sports.”

Yongeyeho ati “Mu cyumweru kimwe hamaze kwiyandikisha abarenga ibihumbi bine kandi umushinga wari utarajya ku mugaragaro, bivuze ko nitumara kuwumurika ku mugaragaro (ku wa Gatandatu tariki 8 Ukwakira 2016) imibare iziyongera cyane. Uyu mushinga utandukanye n’indi yagiye iza kuko wizwe neza kandi natwe dufata umwanya wo kuwusuzuma bihagije.”

Gakwaya avuga ko iyo mibare y’abakunzi b’iyi kipe izajya ihabwa agaciro cyane mu gihe ikipe itegura ahantu izakorera ibikorwa byo gusura abafana, kwerekana ibikombe, gukina imikino ya gishuti n’ibindi. Icyo gihe ngo hazajya harebwa aho ikipe ifite abakunzi benshi kurusha ahandi.

Ikindi ngo uyu mwaka, ubuyobozi bwifuje gukoresha imyenda y’abafana isa n’iy’abakinnyi ku buryo bajya bayigura ku giciro kibabereye kandi bikagirira inyungu ikipe, ariko bitewe n’uko bataramenya imibare y’abafana, ngo ntiyakoreshwa kuko batajya mu ruganda ngo bakoreshe imyenda batazi uzayigura n’ubushobozi bw’iyo yabasha kwishyura.

Kwiyandikisha ku bafana ba Rayon Sports hakoreshejwe kode *699# (kuri simcard za MTN, Tigo, Airtel). Kumurika iyi gahunda bizaba kuri uyu wa Gatandatu tariki 8 Ukwakira 2016 kuri stade Amahoro i Remera, aho Rayon Sports izakina umukino wa gishuti na AS Kigali, saa 15:30, kwinjira bikazaba ari amafaranga 1000, 2000, 3000 na 5000 mu myanya y’icyubahiro.

Ku bafana bamaze kwiyandikisha muri uyu mushinga, bazagabanyirizwa ibiciro byo kwinjira aho azajya yerekana ubutumwa bugufi yahawe yiyandikisha maze akurirwe amafaranga 500 ku yo yagombaga kwishyura bitewe n’aho azicara.

Uyu mushinga ugamije kumenya imibare nyayo y'abakunzi ba Rayon Sports

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 1 Ugushyingo 2016
Copyright © 2009 -2014 - IGIHE Ltd - All Rights Reserved