Kwamamaza

Minispoc yasobanuye aho kwakira “CAN 2025” i Kigali bigeze

Yanditswe kuya 26-10-2016 saa 06:58' na Manzi Rema Jules


Minisiteri y’Umuco na Siporo, Minispoc, yatangaje ko nyuma yo gusaba impuzamashyirahamwe y’umupira w’amaguru muri Afurika, CAF, kuzakira imikino ya nyuma y’igikombe cya Afurika cya 2025, ubu u Rwanda rutegereje “inyandiko ikubiyemo ibisabwa ngo igihugu gihabwe kwakira iri rushanwa” izava i Cairo.

Nyuma yo kwakira imikino y’igikombe cya Afurika cy’abakina imbere mu bihugu byabo, CHAN 2016 muri Mutarama, abayobozi ba CAF n’ibitangazamakuru mpuzamahanga batangaje ko iryo rushanwa ryagenze neza, byatumye u Rwanda rwifuza no kwakira igikombe cya Afurika cya 2025.

Mu kiganiro umuyobozi ushinzwe siporo muri MINISPOC, Bugingo Emmanuel yagiranye na IGIHE, yavuze ko gusaba byamaze gukorwa kandi na leta ifite ubushake bwo kwakira iri rushanwa, bityo ngo icyo bategereje ni inyandiko ikubiyemo ibyo u Rwanda rusabwa kuzuza kugira ngo byemezwe burundu ko CAN 2025 izabera i Kigali.

Ati “Ikiriho kugeza ubu ni uko habanje kurebwa inyandiko ikubiyemo icyo igihugu gisabwa ngo cyemererwe kwakira iri rushanwa. CAF yatubwiye ko iyo nyandiko bakirimo kuyivugurura kugeza ubu niyo dutegereje ariko ubushake burahari na leta irabishyigikiye cyane.”

Ni ngombwa gutegura “Amavubi” yazakina iki gikombe

Ku bijyanye n’ikipe y’igihugu Amavubi muri iki gihe yibazwaho byinshi bitewe no kuba nta murongo ugaragara ifite ku buryo Abanyarwanda bakwizera ko no mu gihe CAF yaba yemeye kuzana iri rushanwa mu Rwanda ryasanga rufite ikipe itari iyo kwitabira gusa, Bugingo avuga ko byatekerejweho kandi ko bazatangira kubikemura vuba.

Ati “Birumvikana ntabwo wasaba kwakira irushanwa nk’iri rikomeye kurusha ayandi muri Afurika ngo ubure gutegura ikipe yawe ikomeye nayo iri ku rwego rwo guhanganira igikombe. Gusa ibi ntibyakunda tutarabona umutoza ari nacyo dufatanyije na Ferwafa turimo gukora.”

“Icya mbere ni ukubanza tukareba umutoza dukeneye uwo ari we n’ibyo agomba kuba yujuje bitewe n’icyo tumukeneyeho. Si buri wese dukeneye ko aza gutoza Amavubi, dushaka umuntu uzaza kubaka umupira n’ikipe ikomeye.”

Hari umunyarwanda ufite amahirwe yo guhabwa gutegura iyi kipe?

Byakunze kugarukwaho n’abatari bake mu bakunzi b’umupira w’amaguru mu Rwanda, bibaza icyo abanyamahanga bazanwa gutoza Amavubi barusha abatoza b’imbere mu gihugu cyane ko nta kinyuranyo bagaragaza. Aha Bugingo yavuze ko kuri iyi nshuro n’Abatoza b’Abanyarwanda badahejwe bityo ko hazarebwa ufite ubushobozi.

Ati “Iyo dushaka umutoza ntabwo tureba ubwenegihugu. Tureba ubushobozi. Turashaka umutoza uza gukemura ibibazo dufite, ashobora kuba Umunyarwanda cyangwa umunyamahanga.”

Mu mikino ya CHAN 2016 ari naryo rushanwa ry’umupira w’amaguru rikomeye ryabereye mu Rwanda, Amavubi yagarukiye muri ¼ asezerewe na Congo Kinshasa, yaje kwegukana icyo gikombe.

U Rwanda rurasaba kwakira CAN 2025 kuko izindi enye zizayibanziriza zamaze gufatwa n’ibindi bihugu harimo iya 2017 igomba kubera muri Gabon mu Ukwakira, iya 2019 izabera muri Cameroun, iya 2021 izabera muri Côte d’Ivoire naho iya 2023 izakirwe na Guinea.

Bugingo yavuze ko u Rwanda rutegereje igisubizo kizava muri CAF

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved