Minisitiri Uwacu yifatanyije mu kababaro n’umuryango wa Evariste wakiniraga Rayon Sports

Yanditswe na IGIHE
Kuya 12 Nzeri 2017 saa 09:57
Yasuwe :
0 0

Minisitiri wa Siporo n’Umuco, Uwacu Julienne, yafashe mu mugongo umuryango w’umunyezamu Mutuyimana Evariste witabye Imana mu gitondo cyo kuri uyu wa Kabiri, tariki ya 12 Nzeri 2017.

Mu butumwa Uwacu yanyujije ku rukuta rwe rwa Twitter yagaragaje ko yababajwe n’urupfu rutunguranye rwa Mutuyimana wakiniraga Rayon Sports wasanzwe yaguye iwe mu rugo aho yari acumbitse i Nyamirambo azize uburwayi butaramenyekana.

Yagize ati “Tubabajwe n’urupfu rutunguranye rwa Mutuyimana Evariste, twihanganishije umuryango we n’aba sportifs muri rusange.”

Kuri uyu munsi kandi Perezida w’Ishyirahamwe ry’Umupira w’Amaguru mu Rwanda (FERWAFA), Nzamwita Vincent De Gaulle, yihanganishije Rayon Sports, umuryango mugari wayo n’uwa Mutuyimana abinyujije mu ibaruwa yoherereje ubuyobozi bwa Rayon Sports.

Mu itangazo yasohoye yagize ati “Twatewe agahinda n’ishavu ryinshi n’inkuru y’urupfu rw’umunyezamu wa Rayon Sports , wanakiniye Amavubi, Mutuyimana Evariste.”

Yongeyeho ati “Mutuyimana yagize uruhare rukomeye mu iterambere ry’umupira w’amaguru mu Rwanda, bitari mu ikipe yakiniraga gusa ndetse no mu y’igihugu yatangiye gukinira mu ntangiriro za 2012. Ubwitange bwe buzahora bwibukwa, Imana imuhe iruhuko ridashira.”

Mu kiganiro IGIHE yagiranye na Ndayishimiye Eric uzwi nka Bakame usanzwe ari na we Kapiteni w’iyi kipe, yavuze ko mugenzi we bafatanyaga kurinda izamu yari afite ikibazo amaranye igihe.

Yagize ati “Hari igihe yajyaga afatwa n’indwara tutazi ubwoko bwayo ariko ijya kumera nk’igicuri akagwa hasi. Rimwe na rimwe twabaga turi mu mwiherero akagira ikibazo tugahita tumufata, ubundi abaganga bakaza bakamwitaho akongera akagarura imbaraga. Mu gitondo (kuri uyu wa Kabiri) rero byashoboka ko yahuye n’iki kibazo akabura umufasha kuko mukuru we babana atari mu rugo.”

Mutuyimana wavutse ku ya 7 Gicurasi 1988. Yamenyekanye akinira Police FC, aho yaje kuva yerekeza muri Sofapaka yo muri Kenya. Uyu muzamu wanakiniraga ikipe y’Igihugu Amavubi yagarutse mu Rwanda muri Kanama 2016 nyuma yo kubengukwa na Rayon Sports, ikipe yari amazemo umwaka ndetse akaba yaratwaranye na yo igikombe cya Shampiyona ya 2016/2017.

Izindi nkuru bifitanye isano:

- Abakinnyi ba Rayon Sports bakoze imyitozo mu gahinda k’urupfu rwa mugenzi wabo (Amafoto)

- “Abarozi bararutana”; ijambo rya nyuma Mutuyimana yabwiye bagenzi be bakinanaga muri Rayon Sports

Ubutumwa bwa Minisitiri Uwacu yanditse kuri Twitter yihanganisha umuryango wa Rayon Sports n'uwa Evariste Mutuyimana
Ferwafa na yo yihanganishije umuryango wa Mutuyimana
Mutuyimana Evariste yari umuzamu wa kabiri wa Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza