Minisitiri Munyangaju yiyemeje impinduka muri MINISPOR, agace ka Remera kahariwe Siporo (Amafoto)

Yanditswe na Eric Tony Ukurikiyimfura
Kuya 15 Ugushyingo 2019 saa 04:03
Yasuwe :
0 0

Minisitiri wa Siporo, Aurore Mimosa Munyangaju, yemeje ko muri iyi minisiteri nshya hari ibigomba guhinduka mu bijyanye n’imikorere kugira ngo irusheho gutanga umusaruro no guteza imbere imikino itandukanye mu Rwanda.

Ibi Minisitiri Munyangaju yabitangarije mu muhango w’ihererekanyabubasha ryabaye kuri uyu wa Gatanu muri Kigali Arena, hagati y’iyahoze ari Minisiteri y’Umuco na Siporo (MINISPOC) na Minisiteri ebyiri zayikomotseho; iya Siporo (Minispor) n’iy’Umuco n’Urubyiruko..

Ati” Ikindi cy’ingenzi ni uko nasaba abakozi ba Minisiteri ya Siporo ko dukomeza kubakira ku ihame ryo gukorera hamwe no guharanira guhindura imikorere, imikoranire yari ihari, tugakomeza kugira ibishya. Ibi byose bikazaba bigamije kugera ku musaruro u Rwanda rutwitezeho nka Minisiteri ya Siporo.”

Mu byo yavuze bizabandwaho muri iyi minisiteri nshya, harimo gukomeza ubufatanye hagati ya Minispor na Ministeri y’Urubyiruko n’Umuco kuko izi nzego eshatu zose zuzuzanya.

Minisitiri Munyangaju yashimangiye ko MINISPOR izibanda ku bufatanye bwayo n’Amashyirahamwe y’imikino atandukanye hagamijwe iterambere rya siporo.

Uwahoze ari Minisitiri wa MINISPOC, Nyirasafari Espérance kuri ubu wagizwe Umusenateri yasabye Minisiteri ya Siporo kuzakomeza gukorana n’abo mu Ishyirahamwe rya Siporo yo mu mashuri babarizwa muri Minisiteri y’Uburezi.

Yasabye ko hakomeza imikoranire hagati ya Minisiteri n’Amashyirahamwe y’imikino ayobowe na Komite Olempike no kuvumbura impano z’abakiri bato ifatanyije na MINEDUC kuko abana benshi baba mu mashuri, binyuze mu mishanga itandukanye irimo Football for Schools, NBA Junior League n’izindi.

Nyirasafari yasabye ko kandi hakomeza gushyirwa imbaraga muri Siporo Rusange (Car Free Day) ikagera no mu midugudu, gutunganya agace kubatsemo Stade Amahoro na Kigali Arena, hakagirwa ahantu hahariwe siporo nk’uko bikubiye mu gishushanyombonera giherutse gukorwa.

Ati” Siporo ya bose dukora, ni ikintu gikomeye kigomba gukomeza kwitabwaho kikagera no mu midugudu, abantu bakumva akamaro ko gukora Siporo, bakayikundisha abakiri bato.”

“Hari gahunda yo gutunganya aha hantu turi, aha Arena, Agace k’Amahoro, kagaharirwa siporo. Hatangiye gutegurwa igishushanyo mbonera ku buryo haba ahantu ha siporo ukahasinga imikino inyuranye y’ingenzi. Iki gishushanyombonera cyazakwitabwaho, birihutirwa.”

Yibukije ko kandi hari umushinga wo kuvugurura Stade Amahoro, anasaba ko amashyirahamwe yari asanzwe ayikoreramo yazafashwa kubona aho yimukira.

Ministeri ya Siporo yibukijwe ko u Rwanda ruherutse gusaba kwakira Shampiyona y’Isi y’Amagare ya 2025 ndetse Nyirasafari asaba Minisitiri wa Siporo n’abo bazakorana ko babishyiramo imbaraga u Rwanda rukaba igihugu cya mbere cyakiriye iri rushanwa muri Afurika.

Uwahoze ari Minisitiri w’Umuco na Siporo, Nyirasafari Espérance ahererekanya ububasha na Minisitiri wa Siporo, Aurore Mimosa Munyangaju
Minisitiri wa Siporo, Aurore Mimosa Munyangaju yavuze ko hari ibizahinduka mu mikorere n'imikoranire yari isanzwe
Uwahoze ari Minisitiri w’Umuco na Siporo, Nyirasafari Espérance kuri ubu ni Visi Pereza wa Sena y'u Rwanda
Minisitiri w'Urubyiruko n'Umuco Mbabazi Rosemary na we yari yitabiriye uyu muhango w'ihererekanyabubasha
Umunyamabanga uhoraho muri Minispor, Shema Maboko Didier (ibumoso) n'Umunyamabanga wa leta muri Minisiteri y'Urubyiruko n'Umuco Bamproki Edouard (iburyo)
Perezida w’Ishyirahamwe ry’Umukino wa Basketball mu Rwanda (FERWABA), Mugwiza Désiré ni umwe mu bayobozi b'Amashyirahamwe y'imikino itandukanye bitabiriye uyu muhango
Umunyamabanga wa Komite Olempike y'u Rwanda, Sharangabo Alex
Nyuma y'ihererekanyabubasha, Nyirasafari yamurikiye kandi aba Minisitiri bashya aho Minispoc yakoreraga
Umunyamabanga wa leta muri Minisiteri y'Urubyiruko n'Umuco Bamporiki Edouard aganira n'Umunyamabanga uhoraho muri Minispor, Shema Maboko Didier

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza