Minisitiri Munyangaju yatambagijwe Stade ya Ngoma izajya iberaho imikino Mpuzamahanga no mu ijoro (Amafoto)

Yanditswe na Eric Tony Ukurikiyimfura
Kuya 26 Ugushyingo 2019 saa 07:10
Yasuwe :
0 0

Minisitiri wa Siporo Munyangaju Aurore Mimosa yatambagijwe Stade ya Ngoma iri hafi kuzura, aho izajya yakira abantu 3500 bicaye neza.

Ku Cyumweru ubwo yari amaze gusoza imikino y’ingororamubiri mu mashuri abanza ku rwego rw’igihugu, Minisitiri Munyangaju yatambagijwe iyi Stade yabereyemo iyi mikino kugira ngo arebe aho imirimo yo kuyubaka igeze.

Yabwiwe ko imirimo yo kuyubaka igeze kure ndetse bitarenze uyu mwaka isigaye izaba yarangiye maze igatangira kwakira amarushanwa atandukanye mu mikino inyuranye.

Minisitiri Munyangaju yavuze ko iyi Stade ubwo izaba yuzuye izaba ifite ubushobozi bwo kwakira imikino mpuzamahanga.

Ati” Stade twayitambagiye. Ni Stade yatanzwe n’inkunga ya Perezida wa Repubulika, impamvu yatanze iyi nkunga ni uko yabonaga ari ngombwa kugira ngo tuzashobore kwakira n’iyindi mikino itari n’iyo mu Rwanda, ishobore kujya ku rwego rwo kwakira imikino Mpuzamahanga.”

Umuyobozi w’Akarere ka Ngoma, Nambaje Aphrodice, na we yashimiye Perezida Kagame wahaye aka karere Stade igezweho izafasha abagatuye kwerekana impano zabo.

Stade ya Ngoma yubatswe ku buso bungana na hegitari 4.5 ikaba yubakwa na CRBC ( China Road and Bridge Corporation) ikazajya yakira abantu 3500 bicaye neza.

Ni Stade ifite ibindi bibuga birimo icya Tennis n’ikindi kizajya gikinirwamo imikino itatu itandukanye irimo Volleyball, Basketball na Handball ndetse by’akarusho ifite running track ikinirwaho n’abasiganwa ku maguru.

Buri kibuga kizaba gifite amatara ku buryo cyanakinirwaho mu masaha y’ijoro bibaye ngombwa.

Iyi Stade yubatswe muri Ngoma, ni imwe muri eshatu Intara y’Iburasirazuba yemerewe na Perezida Kagame ubwo yiyamamazaga mu 2017. Izindi zubatswe mu Bugesera n’i Nyagatare.

Imirimo yo kubaka Stade ya Ngoma iri kugana ku musozo
Stade ya Ngoma izajya yakira abantu 3500 bicaye neza
Minisitiri Munyangaju yatambagijwe ibice byayo byose birimo n'ahari kubakwa ibibuga by'indi mikino y'amaboko
Yasobanuriwe aho imirimo yo kubaka iyi Stade igeze
Minisitiri wa Siporo, Aurore Mimosa Munyangaju yavuze ko ari Stade izajya yakira imikino mpuzamahanga
Umuyobozi w'Akarere ka Ngoma Nambaje Aphrodice yashimiye Perezida Kagame wahaye abatuye aka Karere aho kwerekanira impano zabo
Stade ya Ngoma izajya iberaho imikino ngororamubiri mu gusiganwa ku maguru
Ikibuga cy'umupira w'amaguru gifite ubwatsi bw'ubukorano bugezweho
Iyi ni imwe muri Stade eshatu Perezida Kagame yemereye Intara y'Uburasirazuba mu 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza