Messi yaciye agahigo ko gukinira FC Barcelone imikino myinshi

Yanditswe na Bukuru JC
Kuya 22 Werurwe 2021 saa 09:44
Yasuwe :
0 0

Rutahizamu w’Umunya-Argentine, Lionel Messi, yaraye aciye agahigo ko kuba umukinnyi umaze gukinira FC Barcelone imikino myinshi mu mateka, nyuma y’uko yayikiniye uwa 786 ubwo yanyagiraga Real Sociedad ibitego 6-1 ku Cyumweru.

Messi w’imyaka 33, yabigezeho arushije umukino umwe Xavi Hernández wakiniye FC Barcelone imikino 785 hagati ya 1998 na 2015.

Ibitego bya FC Barcelone byatsinzwe na Antoine Griezmann, Sergiño Dest watsinze bibiri, Ousmane Dembele ndetse na Lionel Messi watsinze bibiri, biyifasha gusigara irushwa amanota ane na Atlético Madrid ya mbere, yo yatsinze Alaves igitego 1-0.

Messi umaze gutsinda ibitego 23 muri La Liga y’uyu mwaka w’imikino, yagaragaje urwego ruri hejuru, aho yanatanze umupira wavuyemo kimwe mu bitego byatsinzwe na Sergiño Dest, ageza ku mipira umunani yatanze mu 2011/12, ikavamo ibitego kuri bagenzi be.

Nubwo amasezerano ye azarangira mu mpeshyi, Messi akomeje kwandika amateka muri FC Barcelone dore ko ibitego bibiri yatsinze, byatumye akomeza kuza ku isonga na 663 yayitsindiye mu marushanwa yose.

Ni we kandi umaze gutsinda byinshi mu mateka ya La Liga n’ibitego 467, arusha Cristiano Ronaldo wakiniye Real Madrid ibitego 156.

Yihariye kandi kuba yaratsinze byibuze ibitego 20 muri La Liga mu myaka 13 yikurikiranya.

Mu gihe hatarashira amezi atatu umwaka wa 2021 utangiye, Messi amaze gutsinda ibitego 15 mu mikino 12 yakinnye.

Naramuka atsinze igitego mu mukino wa El Clásico uzaba muri Mata, azahita arenga ku bitego 26 yinjije mu izamu rya Real Madrid mu marushanwa yose, ibintu bitarakorwa n’undi mukinnyi.

Lionel Messi yaciye agahigo ko kuba umukinnyi umaze gukinira FC Barcelone imikino myinshi
Antoine Griezmann yatsinze igitego kimwe muri bitandatu Barcelone yanyagiye Real Sociedad
Sergiño Dest yatsinze ibitego bibiri muri uyu mukino
FC Barcelone yafashe umwanya wa kabiri irushwa amanota ane na Atletico Madrid ya mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .