Messi, Cristiano na van Dijk ni bo bazatorwamo umukinnyi w’umwaka wa UEFA

Yanditswe na IGIHE
Kuya 15 Kanama 2019 saa 04:55
Yasuwe :
0 0

Ishyirahamwe ry’umupira w’amaguru mu Burayi, UEFA, ryatangaje abakinnyi batatu bazatorwamo uwahize abandi mu mwaka ushize w’imikino, ari bo Virgil van Dijk, Lionel Messi na Cristiano Ronaldo.

Ni bo bazavamo umukinnyi w’umwaka mu cyiciro cy’abagabo mu Burayi, uzatorwa ku wa Kane tariki 29 Kanama 2019. Ni nabwo hazatomborwa uko amakipe azahura mu matsinda muri UEFA Champions League.

Myugariro Van Dijk w’imyaka 28 ukinira Liverpool FC, ageze kuri uru rwego nyuma yo gufasha iyi kipe ye kwegukana igikombe cya UEFA Champions League muri uyu mwaka, hamwe na UEFA Super Cup baraye begukanye nyuma yo gutsinda Chelsea.

Van Dijk kandi yanageze ku mukino wa nyuma wa UEFA Nations League, batsindwa na Portugal.

Lionel Messi yarangije umwaka ushize w’imikino ari we watsinze ibitego byinshi muri Champions League ndetse yegukanye urukweto rwa zahabu nk’uwatsinze ibitego byinshi i Burayi , hamwe n’igikombe cya cumi cya shampiyona yo muri Espagne yatwaye hamwe na FC Barcelona.

Barcelona yavanwe muri Champions League na Liverpool ikinamo Van Dijk, nubwo umukino wa mbere wabereye Nou Camp warangiye batsinze 3-0, Anfield ho Barcelona yanyagiwe 4-0.

Ronaldo we yaje kuri uru rutonde nyuma yo kwegukana igikombe cya mbere cya shampiyona mu Butaliyani, nyuma yo kwerekeza muri Juventus kuri miliyoni £100 avuye muri Real Madrid, ndetse yatsinze ibitego 28 mu mwaka we wa mbere.

Juventus yagarukiye muri kimwe cya kane cya Champions League mbere yo gusezererwa na Ajax, ariko Ronaldo ayoboye Portugal babashije kwegukana Nations League, irushanwa ryari rihuje ibihugu ryakinzwe ku nshuro ya mbere, anarisoza ari we utsinze ibitego byinshi.

Abandi bakinnyi bamaze gushyirwa mu myanya ni

4) Alisson Becker (Liverpool & Brésil)
5) Sadio Mane (Liverpool & Sénégal)
6) Mohamed Salah (Liverpool & Misiri)
7) Eden Hazard (Chelsea/Real Madrid & u Bubiligi)
8) Matthijs de Ligt (Ajax/Juventus & u Buholandi)
9) Frenkie de Jong (Ajax/Barcelona & u Buholandi)
10) Raheem Sterling (Manchester City & u Bwongereza)

Virgil van Dijk afite amahirwe menshi yo gutorwa nk'umukinnyi w'umwaka wa UEFA nyuma yo gutwara Champions League
Lionel Messi mu mwaka ushize w'imikino ari mu batsinze ibitego byinshi i Burayi
Ronaldo yegukanye shampiyona yo mu Butaliyani hamwe na Nations League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza