00:00:00 IGIHE NETWORK KN KINYARWANDA EN ENGLISH FR FRANCAIS

Meddie Kagere yihakanye Gakumba ‘Super Manager‘ wamwiyitiriraga

Yanditswe na Habimana Sadi
Kuya 8 Kamena 2021 saa 04:48
Yasuwe :
0 0

Rutahizamu w’Amavubi na Simba SC yo muri Tanzania, Meddie Kagere, yahakanye ko nta masezerano afitanye n’umu-agent uwo ari we wese harimo na Gakumba Patrick ‘Super Manager‘ wakunze kuvuga ko amuhagarariye.

Ntabwo ari inshuro ya mbere, Gakumba Patrick avuga ko ari we uhagarariye rutahizamu Meddie Kagere ndetse ko ari we ushinzwe kumushakira akazi.

Kuva mu 2018 ubwo Meddie Kagere yatandukanaga na Gor Mahia, Gakumba Patrick yatangiye kumvikana avuga ko ari we wamukuye muri iyi kipe akamujyana muri Simba SC yo muri Tanzania.

Kuva ubwo kugeza magingo aya, Gakumba yakomeje kumvikana avuga ko ari we uhagarariye inyungu z’uyu rutahizamu w’Amavubi wavukiye muri Uganda.

Abajijwe ku kuba hari uhagarariye inyungu ze ‘Agent‘, Meddie Kagere yabihakanye yivuye inyuma ahakana n’imikoranire na Gakumba. Ati “Nta ’agent’ mfitanye na we amasezerano."

Ibi Kagere abitangaje nyuma y’aho mu minsi ishize Gakumba Patrick yari yatangaje ko uyu rutahizamu ashobora kuzamujyana muri Yanga Africans.

Mu kiganiro na IGIHE, Gakumba Patrick yemeye ko amasezerano yari afitanye na Meddie Kagere yarangiye ariko ko ari we watumye izina rye ritumbagira.

Ati “Ibyo Kagere Meddie yavuze nta na kimwe yabeshye kuko amasezerano yanjye na we yarangiye ku itariki 5 Kamena 2021. Ibyo yavuze ntabwo yavuze nabi kuko ntabwo yanyihakanye nta nubwo yanyemeye. Ibyo yavuze nibyo kuko nta masezerano ngifitanye na we.”

Gakumba yakomeje asobanura ko nubwo atagihagarariye inyungu za Meddie Kagere, ari we wamukuye muri Gor Mahia akamujyana muri Simba SC hamuhinduriye ubuzima.

Ati “Mwese mwarabirebaga ajya Tanzania, naragiye ndamusinyisha bwa mbere kuko ibimenyetso birahari. Yari yarasinye imyaka ibiri nyuma kuko yari agifitanye nanjye amasezerano, ndongera nkoresha uburyo bwanjye mvugana n’abayobozi ba Simba SC mbasaba ko bamwongera undi mwaka kugira ngo turebe ko yanabona indi kipe yisumbuyeho.”

Yakomeje avuga ko yagejeje byinshi kuri Meddie Kagere kuko uyu rutahizamu yaguze inzu ari uko ageze muri Simba SC kandi nyamara yaravuye mu Rwanda adahabwa agaciro no muri Gor Mahia hakaba hari haje ikibazo cy’amikoro make.

Ati “Mfite ibyo namugejejeho kuko nta na rimwe yari yarigeze aryoherwa n’umupira. Yamaze kubona iterambere kandi ninjye warimugejejeho kuko yarigezeho ageze muri Simba SC. Muri Simba SC yashoboye kubakira inzu, muri Simba SC niho yabashije kuba umukinnyi ufata amafaranga, urabizi ko bari baramujugunye mu Rwanda bamuhanahana no mu Ikipe y’Igihugu. Ariko njye nakoresheje uburambe bwanjye nzamura izina rye.”

Yashimiye uburyo Meddie Kagere yamubereye umukinnyi mwiza, wubaha kandi ukunda akazi ke ndetse bombi bakaba hari icyo bamariranye mu gihe bamaze bakorana.

“Ndamushimira cyane kuko yatumye izina ryanjye rizamuka, hari byinshi nagezeho kubera we. Sinamuvuga nabi kuko ndamwubaha kandi nawe aranyubaha. Turanavugana rwose. Anashatse ko twongera gukorana nta kibazo kuri njye.”

Meddie Kagere ari mu bakinnyi ba Simba SC barimo gusoza amasezerano yabo azarangira mu mpera z’uyu mwaka w’imikino 2020-2021.

Yakiniye Ikipe ya Mbale Heroes FC hagati ya 2004-2006. Yahavuye ahita aza mu Rwanda mu Ikipe ya Atraco FC mu 2006. Nyuma y’umwaka umwe yagiye muri Kiyovu Sports yavuyemo yerekeza muri Mukura Victory Sports mu mwaka w’imikino 2008-2009 kugeza mu 2010 ubwo yajyaga muri Police FC, aho yakinnye imikino 40 agatsinda ibitego 38.

Mu 2012 yerekeje muri ES Zaris yo muri Tunisia atamazemo igihe, ahita agaruka muri Police FC.

Nyuma yaho yakinnye muri Rayon Sports FC, aho mu mikino 12 ya shampiyona yo kwishyura, yatsindiye iyi kipe ibitego umunani.

Mu 2014 yerekeje muri Albania mu ikipe ya KF Tirana, batandukanye tariki ya 1 Mutarama 2015, basheshe amasezerano.

Mu 2015, ni bwo Kagere Meddie yatangiye gukinira Gor Mahia afite amasezerano y’umwaka umwe, aho yayitsindiye ibitego 31 mu mikino yose yakinnye, ariko bananirwa kumvikana ku masezerano mashya, batandukana muri Mutarama.
Gor Mahia yamugaruye nyuma y’amezi atandatu, aho yayivuyemo mu mwaka ushize ajya muri Simba SC.

Kagere ni umukinnyi w’Ikipe y’Igihugu Amavubi kuva mu 2011, ubwo u Rwanda rwatsindaga Bénin igitego 1-0 akaba ari we wagitsinze.

Mu 2015 na we yahagaritswe mu nkubiri y’abanyamahanga mu Amavubi, yongera guhamagarwamo mu 2018 ubwo u Rwanda rwatsindwaga na Côte d’Ivoire ibitego 2-1, akaba ari na we utsinda iki gitego.

Meddie Kagere (22) yongeye kuzamurira izina rye muri Gor Mahia yo muri Kenya
Kujya muri Simba SC byamwongereye agaciro yongera guhamagarwa mu Ikipe y'Igihugu y'u Rwanda, Amavubi
Muri 2019 Kagere yari yongereye amasezerano y'imyaka ibiri iri kurangira
Gakumba Patrick 'Super Manager' ahamya ko yahinduriye ubuzima Kagere ubwo yamujyanaga muri Simba SC yo muri Tanzania
Meddie Kagere ni umukinnyi wubashywe muri Simba SC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .