00:00:00 IGIHE NETWORK KN KINYARWANDA EN ENGLISH FR FRANCAIS

Masudi Djuma yongeye kugirwa umutoza mukuru wa Rayon Sports

Yanditswe na Eric Tony Ukurikiyimfura
Kuya 15 Nyakanga 2021 saa 05:35
Yasuwe :
0 0

Masudi Irambona Djuma ukomoka mu Burundi ni we wongeye kugirwa Umutoza Mukuru wa Rayon Sports ku masezerano y’imyaka ibiri.

Kuri uyu wa Kane, tariki ya 15 Nyakanga 2021, ni bwo Rayon Sports yatangaje ko Masudi Djuma yagizwe umutoza mushya ku masezerano y’imyaka ibiri.

Masudi yagarutse muri Rayon Sports, ikipe ya mbere yabereye umutoza mukuru guhera muri Gashyantare 2016, ayihesha Igikombe cya Shampiyona ya 2016/17 n’Igikombe cy’Amahoro cya 2016.

Rayon Sports nta mutoza yari ifite nyuma yo gutandukana n’Umunye-Congo Guy Bukasa wagiye habura imikino ibiri ngo umwaka w’imikino wa 2020/21 urangire.

Kayiranga Baptiste usanzwe ari Umuyobozi wa Tekinike, ni we watoje iyo mikino Rayon Sports yatsinzwemo na Rutsiro FC ndetse na Espoir FC.

Masudi Djuma w’imyaka 44, yageze mu Rwanda bwa mbere mu 1996, akinira APR FC imyaka ibiri mbere yo kwerekeza muri Kiyovu Sports.

Mu 2003 ni bwo yerekeje muri Rayon Sports maze mu 2004 ayifasha gutwara Shampiyona ubwo yatozwaga na Kayiranga Baptiste, nyuma ava muri iyi kipe yerekeza muri Seychelles mbere yo kugaruka mu bururu n’umweru mu 2006, agakina umwaka umwe.

Masudi yaretse gukina ruhago mu 2010 mu Ikipe ya Inter Stars, agana mu butoza aho kugeza ubu afite Licence B ya CAF yabonye mu 2013.

Nyuma yo gutandukana na Rayon Sports mu 2017, yabaye Umutoza wungirije muri Simba SC mu mwaka w’imikino wa 2017/18, ahava agaruka mu Rwanda mu 2019, aho yagizwe Umutoza wa AS Kigali ndetse na Bugesera FC nyuma yaho.

Ahandi yatoje ni muri Inter FC na Inter Star z’i Burundi, aho yari umutoza wungirije ndetse no mu Ikipe y’Igihugu y’u Burundi y’abato yatoje mu 2015. Indi kipe yatoje ni Bukavu Dawa yo muri Repubulika Iharanira Demokarasi ya Congo.

Masudi Djuma yasinye amasezerano y'imyaka ibiri nk'Umutoza Mukuru wa Rayon Sports
Masudi ukomoka mu Burundi, yasubiye muri Rayon Sports yahesheje igikombe cy'Amahoro n'icya Shampiyona mu myaka ine ishize
Perezida wa Rayon Sports, Uwayezu Fidèle yifotozanya na Masudi Djuma nyuma yo gusinya amasezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .