Kwamamaza

Masudi Djuma yahishuye icyamuteye kugura Rwigema Yves muri mukeba

Yanditswe kuya 21-09-2016 saa 13:29' na Manzi Rema Jules


Umutoza wa Rayon Sports, Masudi Djuma, yatangaje ko ari we wasabye abayobozi b’ikipe ye kugura myugariro wa APR FC Rwigema Yves kuko yamukurikiranye agasanga hari ubuhanga yihariye mu gufasha ikipe gusatira ndetse no kugarira, bimwe mu byo yabonye ikipe ye yaburaga.

Ku mugoroba wo kuri uyu wa Kabiri tariki 20 Nzeri 2016, ni bwo Rayon Sports yatangaje ko yamaze gusinyisha imyaka ibiri myugariro Rwigema Yves wari usanzwe akinira mukeba APR FC ndetse ikaba ari na yo yamureze (biva ku ’kurera’).

Nyuma y’imyitozo yo kuri uyu wa Gatatu, Masudi Djuma yabwiye IGIHE ko nyuma yo kubona ko hari icyuho mu bwugarizi cyane bitewe n’uko bamwe mu bakinnyi be bitwaye mu irushanwa rya “AS Kigali Pre season Tournament” batahanyemo umwanya wa gatatu, ngo yasabye abayobozi kumushakira abandi bakinnyi.

Ati “Imikino ibanziriza shampiyona (Pre- season) ni ko kamaro kayo. Twagombaga kureba aho dufite imbaraga ariko tukanareba ahari icyuho kugira ngo dutangire shampiyona tumeze neza. Aho nabonye bitagenda nasabye abayobozi abandi bakinnyi ariko bigendana n’ubushobozi. Bikunze si Rwigema gusa haza n’abandi kuko tuzakina amarushanwa menshi.”

Ku cyutumye ashyira imbere kuvana Rwigema muri Rayon Sports, Masudi yagize ati “Ni umukinnyi utarabonye amahirwe yo gukina. Njye ndashaka kuyamuha. Hari ibyo yihariye birimo gufasha mu gusatira ariko akaba n’umuhanga mu kugarira. Ni ibintu utapfa kubona abakinnyi benshi babifite byose icya rimwe.”

Masudi ushaka guhesha Rayon Sports igikombe cya shampiyona nyuma yo kuyihesha icy’Amahoro mu mwaka ushize wa shampiyona, yavuze ko uyu mukinnyi atangira imyitozo n’abandi bitarenze iminsi ibiri ndetse ashimangira ko ibye bitazaba nk’ibya Rwatubyaye Aboudul wasinyiye Rayon Sports avuye muri APR FC mu minsi ishize akaburirwa irengero.

Ati “Ibya Rwatubyaye nta kiintu nabivugaho kuko asinya ntimwigeze mubona ifoto yanjye na we, ariko uyu we mwayibonye. Ubwo ndumva ibya Rwigema ntaho bihuriye n’ibya Rwatubyaye, we nataza mu myitozo muzabimbaze.”

Gusa nubwo Masudi yizeye ko uyu mukinnyi azakinira Rayon Sports, APR FC yo iravuga ko ibyo Rayon Sports yakoze bidakwiye bitewe n’uko Rwigema yari akiyifitiye amasezerano, ibintu bisa n’ibya Rwatubyaye ndetse na Imanishimwe Emmanuel wavuye muri Rayon Sports ajya muri APR FC kandi yari yamaze kongera amasezerano muri iyi kipe y’i Nyanza bigasa n’ibiteza amahane.

Manishimwe Djabel (ufite umupira) mu myitozo yo kuri uyu wa Gatatu
Umuzamu Bakame na we yari yazindukiye mu myitozo yo kuri uyu wa Gatatu
Masudi yemeje ko ubuhanga bwa Rwigema ari bwo bwatumye amugura
Abakinnyi banyuranye ba Rayon Sports bari bitabiriye imyitozo
Rwigema Yves azafatanya n'abakinnyi nka Munezero Fiston mu bwugarizi bw'ikipe ya Rayon Sports
Masudi Djuma (iburyo) yitegereza uko abakinnyi be bitwara mu myitozo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved