Mashami yahamagaye 27 b’Amavubi yitegura Mozambique na Cameroun batarimo Mukunzi Yannick

Yanditswe na Eric Tony Ukurikiyimfura
Kuya 6 Ugushyingo 2019 saa 10:46
Yasuwe :
0 0

Umutoza Mukuru w’Ikipe y’Igihugu y’u Rwanda (Amavubi), Mashami Vincent, yahamagaye abakinnyi 27 mu mwiherero ugamije gutegura imikino ibiri yo mu itsinda F ryo gushaka itike y’igikombe cya Afurika (CAN 2021), u Rwanda ruzakirwamo na Mozambique tariki ya 14 Ugushyingo n’uwa Cameroun uzaba tariki ya 19 Ugushyingo.

Muri uru rugendo rugana muri Cameroun mu 2021, ikipe y’u Rwanda izaba ihanganye n’iy’ikipe y’igihugu kizakira irushanwa, iya Mozambique ndetse na Cap-Vert.

Amavubi azakirwa na Mozambique Ku wa Kane tariki ya 14 Ugushyingo kuri Zimpeto Stadium i Maputo, ahite agaruka mu Rwanda gukina na Cameroon nyuma y’iminsi itatu tariki ya 17 Ugushyingo i Nyamirambo.

Mu kiganiro n’abanyamakuru cyabereye ku cyicaro cya FERWAFA kuri uyu wa Kane, Mashami yatangaje abakinnyi bitegura uyu mukino batarimo Mukunzi Yannick ukinira Sandvikens IF yo mu cyiciro cya gatatu muri Suède, kuko amaze iminsi arwaye.

Mu ikipe yahamagawe, harimo abakinnyi 11 bakina hanze y’u Rwanda, barindwi ba APR FC, batatu ba Rayon Sports, batatu ba AS Kigali na batatu ba Police FC.

Umunyezamu Mvuyekure Emery wa Tusker FC muri Kenya yongeye guhamagarwa nyuma y’amezi umunani kimwe na Niyonzima Ally ukina muri Oman na we waherukaga guhamagarwa muri Werurwe ku mukino u Rwanda rwatsinzwemo na Côte d’Ivoire muri Werurwe.

Nirisarike Salomon utarakinnye imikino ya Seychelles kubera ko icyo gihe ari bwo yerekeje muri muri FC Pyunik yo muri Armenia na we yongeye kugirirwa icyizere.

Habarureman Gahungu wa Police FC yahamagawe bwa mbere mu ikipe nkuru mu gihe Mutsinzi Ange utaritabiriye ubutumire ubushize yongeye kugirirwa icyizere.

Rutahizamu Sugira Ernest uheruka guhagarikwa amezi abiri muri APR FC na we ntiyahamagawe, ahubwo hitabazwa Usengimana Danny umaze gutsinda ibitego bine muri Shampiyona.

Mashami Vincent yavuze ko ikipe y’igihugu itangira imyitozo kuri uyu wa Kane ku bakinnyi bakina imbere mu gihugu ukuyemo aba APR FC bafite umukino uzabahuza na Kiyovu Sports ku wa Gatanu ku munsi wa munani wa Shampiyona.

Biteganyijwe ko abakina hanze y’u Rwanda bazatangira kugera mu mwiherero w’Amavubi kuri uyu wa Kane.

Muri iyi mikino y’amatsinda, U Rwanda ruzaba rusabwa kuba urwa mbere cyangwa rukaba urwa kabiri mu gihe Cameroun yaza imbere kuko hazazamuka ikipe imwe muri itsinda F (Cameroun ifite itike).

Abakinnyi bahamagawe

Abanyezamu: Ndayishimiye Eric (AS Kigali), Kimenyi Yves (Rayon Sports), Habarurema Gahungu (Police FC) na Mvuyekure Emery (Tusker FC, Kenya).

Ba myugariro: Manzi Thierry (APR FC), Fitina Omborenga (APR FC), Imanishimwe Emmanuel (APR FC), Rutanga Eric (Rayon Sports), Mutsinzi Ange (APR FC), Bayisenge Emery (Saif Sporting Club, Bangladesh), Rwatubyaye Abdul (Colorado Rapids, USA) na Nirisarike Salomon (Pyunik FC, Armenie).

Abakina hagati: Niyonzima Haruna (AS Kigali), Iranzi Jean Claude (Rayon Sports), Niyonzima Ally (Oman), Niyonzima Olivier (APR FC), Nsabimana Eric (AS Kigali), Muhire Kevin (Misr El Makkasa, Misiri), Bizimana Djihad na (Waasland Beveren, Mu Bubligi) na Manishimwe Djabel (APR FC).

Ba rutahizamu: Mico Justin (Police FC), Usengimana Danny (APR FC), Kagere Meddie (Simba SC, Tanzania), Tuyisenge Jacques (Pétro Atletico, Angola), Hakizimana Muhadjiri (Emirates Club, EAU), Iyabivuze Osée (Police FC) na Sibomana Patrick (Young Africans, Tanzania).

Mashami yatangaje abakinnyi bagomba kwitegura imikino u Rwanda ruzahuramo na Mozambique na Cameroun mu gushaka itike ya CAN 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza