Manzi Thierry na Sefu bakiniraga Rayon Sports berekeje muri APR FC

Yanditswe na Eric Tony Ukurikiyimfura
Kuya 25 Kamena 2019 saa 08:20
Yasuwe :
0 0

Abakinnyi babiri bari muri Rayon Sports, Manzi Thierry na Niyonzima Olivier ‘Sefu’ bemeranyijwe na APR FC kuyikinira mu myaka ibiri iri imbere. Bombi bari bamaze iminsi batandukanye n’iyi kipe yatwaye shampiyona nyuma yo kwanga kongera amasezerano.

IGIHE yamenye ko Manzi Thierry yahawe na APR FC miliyoni 12 Frw ngo azayikinire imyaka ibiri, aho azajya ahabwa umushahara w’ibihumbi 900 Frw ku kwezi mu gihe Niyonzima Olivier Sefu yemeranyijwe n’iyi kipe ya gisirikare kuyerekezamo kuri miliyoni 10 Frw n’umushahara w’ibihumbi 800 Frw.

Biteganyijwe ko aba bakinnyi bombi bashyira umukino ku masezerano yo gukinira ikipe y’ingabo kuri uyu wa Gatatu mu gitondo nk’uko IGIHE ibikesha umwe mu nshuti zabo.

Tariki ya 16 z’uku kwezi nibwo Rayon Sports yafashe umwanzuro wo gutandukana n’aba bakinnyi bombi bayihesheje igikombe cya shampiyona nyuma y’uko banze kongera amasezerano.

Manzi Thierry yageze muri Rayon Sports mu 2015 avuye muri Marines FC mu gihe Niyonzima Olivier ‘Sefu’ we yari avuye mu Isonga FC.

APR FC ikomeje kwitegura imikino ya CECAFA Kagame Cup izabera mu Rwanda guhera tariki ya 7 kugeza ku ya 21 Nyakanga, aho iri mu itsinda C hamwe na Proline FC yo muri Uganda, Green Buffaloes yo muri Zambie na Heegan FC yo muri Somalie.

Iyi kipe imaze kwegukana iri rushanwa riterwa inkunga na Perezida Kagame inshuro eshatu, biravugwa ko kandi yamaze kugarura umunyezamu Rwabugiri Omar wayibayemo mbere yo gukinira Musanze FC na Mukura Victory Sports.

APR FC yongeye kugira umwaka mubi w’imikino nyuma y’imyaka itandatu ifashe gahunda yo gukinisha Abanyarwanda, aho yasoje uyu mwaka w’imikino nta gikombe cy’amarushanwa yemewe y’imbere mu gihugu itwaye ndetse ishobora no kubura amahirwe yo guserukira igihugu mu gihe Rayon Sports yatwaye shampiyona itakwegukana Igikombe cy’Amahoro cy’uyu mwaka.

Myugariro wo hagati, Manzi Thierry, yumvikanye na APR FC kuyikinira nyuma y'iminsi mike asezerewe muri Rayon Sports
Niyonzima Olivier 'Sefu' ukina hagati mu kibuga, na we yatandukanye na Rayon Sports muri uku kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza