Manzi, Djabel, Mutsinzi na Sefu bakoze imyitozo ya mbere muri APR FC (Amafoto)

Yanditswe na Ntare Julius
Kuya 1 Nyakanga 2019 saa 04:35
Yasuwe :
0 0

APR FC yerekanye abakinnyi barindwi bashya barimo Manishimwe Djabel, Niyonzima Olivier ‘Sefu’ na Manzi Thierry na Mutsinzi Ange bahoze bakinira Rayon Sports.

Ni igikorwa cyabereye kuri Stade ya Kicukiro mbere y’imyitozo yabaye ku mugoroba wo kuri uyu wa Mbere, tariki ya 1 Nyakanga 2019.

Mu buryo butunguranye, Manishimwe Djabel ukina hagati mu kibuga afasha abataha izamu, yagaragaye mu Ikipe y’Ingabo nyuma y’umunsi umwe bitangajwe ko yasinyiye ikipe ya Gor Mahia yo muri Kenya.

Ibinyujije ku rukuta rwayo rwa Twitter ku Cyumweru, tariki ya 30 Kamena 2019, Rayon Sports yari yatangaje ko yemeranyijwe na Gor Mahia kuri Manishimwe, inamwifuriza amahirwe masa. Uyu mukinnyi byavugwaga ko yatanzweho ibihumbi $30 na Gor Mahia.

We na bagenzi be barimo Manzi wari kapiteni wa Rayon Sports mu mwaka ushize na myugariro uri mu bahagaze neza Mutsinzi Ange na Sefu ukina hagati arinda izamu bakoranye imyitozo n’abandi bakinnyi ba APR FC nyuma yo kwerekanwa .

Umunyamakuru wa IGIHE uri ku Kicukiro yabonye aba bakinnyi bakiranwa urugwiro n’abafana ba mukeba.

Mu bandi bakinnyi, APR FC yerekanye barimo Umunyezamu Ahishakiye Hertier na myugariro Niyigena Clément bavuye muri Marines FC na Nkomezi Alexis ukina mu kibuga hagati wavuye muri Mukura VS. Mu myitozo ya mu gitondo, umunyezamu Rwabugiri Omar wavuye muri Mukura VS na we yagaragaye mu mwambaro w’iyi kipe abafana bita ’Gitinyiro’.

Aba bakinnyi berekanwe nyuma y’iminsi mike APR FC yirukanye abagera kuri 16 barimo abari inkingi za mwamba zayo mu myaka yashize.

Manishimwe Djabel (imbere ibumoso), Niyonzima Olivier ‘Sefu’ (uri ibumoso mu b'inyuma), Manzi Thierry (imbere iburyo) na Mutsinzi Ange umuri inyuma bwa mbere mu mwambaro wa APR FC
Manishimwe Djabel (ibumoso), Manzi Thierry bahuje urugwiro na myugariro Ombolenga Fitina usanzwe akina muri APR FC

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza