Manishimwe Djabel mu muryango winjira muri APR FC

Yanditswe na Ntare Julius
Kuya 29 Kamena 2019 saa 02:58
Yasuwe :
0 0

Umukinnyi wo hagati w’ikipe ya Rayon Sports, Manishimwe Djabel, yaba ari mu muryango winjira muri APR FC ndetse ashobora kuyerekezamo nyuma y’igikombe cy’Amahoro nk’uko amakuru yizewe agera ku IGIHE abyemeza.

Uyu musore ufasha abataha izamu ndetse akaba ari we wahawe igitambaro cya kapiteni muri Gikundiro, ategerereje ko igikombe cy’Amahoro kirangira akaba yakwerekanwa ku mugaragaro mu mwenda wa APR FC dore ko n’ibiganiro bishobora kuba byararangiye nk’uko amakuru agera ku IGIHE abihamya.

Manishimwe Djabel wigaragaje muri uyu mwaka w’imikino ugiye kugera ku musozo ndetse anagira uruhare mu bitego byinshi byafashishije iyi kipe gutwara igikombe cya Shampiyona.

Uyu mukinnyi kandi yanabengutswe n’ikipe ya Gor Mahia nayo ifite amahirwe yo kumwegukana, akaba yakwerekeza muri Kenya mu gihe ikipe y’iki gihugu Harambee Stars yaba isezerewe mu gikombe cya Afurika ubwo hazaba herekanwa abakinnyi ba Gor Mahia bashya.

Si uyu mukinnyi wenyine wa Rayon Sports waba waremeranyijwe na APR FC yiteguye kugura umwaka umwe w’amasezerano asigaranye muri Rayon Sports.

Ikipe y’’ingabo yamaze kumvikana kandi na myugariro wo hagati no ku ruhande, Mutsinzi Ange na we byitezwe ko azerekanwa nk’umukinnyi mushya muri iyi kipe ubwo igikombe cy’Amahoro kizaba kigeze ku musozo.

Kuri uyu wa Gatanu nibwo APR FC yatangaje ko yasezereye abakinnyi 16 barimo abari inkingi za mwamba ibaziza umusaruro muke ndetse n’imyitwarire mibi haba mu kibuga ndetse no hanze yacyo.

Abo bakinnyi barimo abanyezamu Kimenyi Yyves na Ntaribi Steven; ba myugariro ni Niragire Ramadhan, Ngabonziza Albert, Rusheshangoga Michel, Rukundo Dennis na Rugwiro Hervé.

Mu bakina hagati hasezerewe Mugiraneza Jean Baptiste ‘Migi’, Nshimiyimana Amran, Nizeyimana Mirafa, Iranzi Jean Claude, Nshuti Dominique Savio, Ntwari Evode, Nsengiyumva Moustapha na Sekamana Maxime ndetse na rutahizamu Bigirimana Issa.

Manishimwe Djabel aramutse asinyiye ikipe y’ingabo z’igihugu, yahita asimbura Nshuti Dominique Savio wasezerewe ndetse banigeze gukinana muri Rayon Sports.

Mu bakinnyi bivugwa ko APR FC yamaze kumvikana na bo harimo Umunyezamu Rwabugiri Omar na Nkomezi Alex bakiniraga Mukura VS; Manzi Thierry, Niyonzima Olivier ‘‘Sefu’’ na Mutsinzi Ange bakiniraga Rayon Sports na Niyomugabo Claude, Ishimwe Kevin na Rurangwa Mossi ba AS Kigali ndetse Mushimiyimana Mohamed wa Police FC.

Manishimwe Djabel usigaranye umwaka ku masezerano ye na Rayon Sports akaba yarazamukiye mu ishuri ry’umupira w’amaguru ry’Isonga ari hano yaguzwe na Rayon Sports amazemo imyaka ine.

Djabel ategereje ko Igikombe cy'amahoro kirangira akabona gusinyira APR FC
Yagiye afasha kenshi ikipe ye ya Rayon Sports haba gutsinda ibitego ndetse no gutanga imipira ibibyara
Nyuma yo guzererwa kwa Manzi Thierry, Manishimwe Djabel ni we wasigaranye inshingano z'Ubukapiteni by'agateganyo
Uyu musore yitabazwa no mu ikipe y'igihugu Amavubi
Mutsinzi Ange yarangije kumvikana na APR FC ategereje ko Igikombe cy'amahoro kirangira akabona gushyira umukono ku masezerano

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza