Manchester City yakomereje kuri Tottenham, Liverpool yandagazwa na Leicester City (Amafoto)

Yanditswe na Bukuru JC
Kuya 14 Gashyantare 2021 saa 08:27
Yasuwe :
0 0

Umunsi wa 24 wa Shampiyona y’Icyiciro cya Mbere mu Bwongereza (Premier League) wasize Manchester City ikomeje kwanikira andi makipe nyuma yo gutsinda Tottenham ibitego 3-0 mu gihe Liverpool yatsinzwe umukino wa gatatu wikurikiranya ubwo yahuraga na Leicester City ku wa Gatandatu.

Manchester City iri mu makipe ataratangiye neza muri Premier League, ariko kugeza magingo aya ni yo ihabwa amahirwe yo kwegukana igikombe cy’uyu mwaka w’imikino.

Mu mukino yari yakiriyemo Tottenham ku wa 13 Gashyantare 2021, yabishimangiye iyitsinda ibitego 3-0 nubwo ikipe y’abashyitsi ari yo yari yabanje kubona uburyo bukomeye ku mupira w’umuterekano watewe na Harry Kane ugafata igiti cy’izamu.

Ikosa Pierre-Emile Hojbjerg yakoreye kuri Ilkay Gundogan ku munota wa 23, ni ryo ryavuyemo igitego cya mbere cyatsinzwe na Rodri kuri penaliti mu gihe umutoza Pep Guardiola akomeje kuvuga ko kugeza ubu nta mukinnyi wihariye afite wo gutera iyi mipira iteretse.

Gundogan ukomeje guhirwa n’uyu mwaka wa 2021 amaze gutsindamo ibitego umunani kurusha abandi bakinnyi bose bo muri Premier League, yatsinze igitego cya kabiri ku munota wa 50 n’icya gatatu ku munota wa 66 mbere yo kuva mu kibuga bigaragara ko yababaye.

Gutsinda uyu mukino byafashije Manchester City kugira amanota 53 ku mwanya wa mbere, irusha arindwi Leicester City yafashe umwanya wa kabiri mu gihe Manchester United ikina kuri iki Cyumweru, ifite amanota 45 ku mwanya wa gatatu.

Ilkay Gündoğan yatsinze ibitego bibiri nyuma yo gukorerwaho penaliti yavuyemo igitego cya mbere cya Manchester City
Umunyezamu Ederson ni we watanze umupira wavuyemo igitego cya gatatu cya Manchester City ku ishoti rirerire yateye imbere
Umutoza wa Tottenham, José Mourinho, ntiyashimishijwe n'uko abakinnyi be bitwaye
Harry Kane yahushije uburyo bwiza ku mupira wagonze igiti cy'izamu
Rodri yafunguye amazamu kuri penaliti yabonetse mu minota 23 ya mbere

=====================================================

Liverpool yatsinzwe umukino wa gatatu yikurikiranya

Undi mukino wabaye ku wa Gatandatu wagarutsweho na benshi ni uwo Leicester City yari yakiriyemo Liverpool kuri King Power Stadium, iyitsinda ibitego 3-1.

Liverpool yari yavunikishije James Milner wasimbuwe na Thiago Alcantara ku munota wa 17, yafunguye amazamu ku munota wa 67 ku gitego cyatsinzwe na Mohamed Salah.

Gusa ntiyorohewe n’iminota 12 ya nyuma, kuko irindwi muri yo, yayitsinzwemo ibitego bitatu byatumye itakaza amanta y’umunsi ndetse biyishyira mu byago byo kubura umwanya wa kane.

James Maddison yishyuriye Leicester City ku munota wa 78 habanje kwifashishwa ikoranabuhanga ry’amashusho ryifashishwa mu misifurire [VAR] bigaragara ko ataraririye mu gihe umunyezamu Alisson Becker yasohotse nabi ku munota wa 82, agonga myugariro Ozan Kabak bari hanze y’urubuga rw’amahina, Jamie Vardy abatwara umupira arawutsinda.

Harvey Barnes ni we watsinze igitego cyashimangiye intsinzi ya Leicester City ku munota wa 85, kinahesha ikipe ye gufata umwanya wa kabiri w’agateganyo mu gihe Liverpool ifite amanota 40 ku mwanya wa kane, yatsindwaga umukino wa gatatu yikurikiranya.

Gahunda y’umunsi wa 24 wa Premier League

Ku wa Gatandatu

  • Leicester City 3-1 Liverpool
  • Crystal Palace 0-3 Burnley
  • Manchester City 3-0 Tottenham
  • Brighton 0-0 Aston Villa

Ku Cyumweru

  • Southampton vs Wolves (14:00)
  • West Brom vs Manchester United (16:00)
  • Arsenal vs Leeds United (18:30)
  • Everton vs Fulham (21:00)

Ku wa Mbere

  • West Ham vs Sheffield United (20:00)
  • Chelsea vs Newcastle United (22:00)
Liverpool yavunikishije James Milner mu gice cya mbere
Umutoza wa Liverpool, Jurgen Klopp, agaragariza abakinnyi be ko atanyuzwe n'ibyo bari gukina
James Madisson yishimira igitego cyo kwishyura ku ruhande rwa Leicester City
Gusohoka nabi kwa Alisson Becker byagize uruhare runini mu gitego cya kabiri Liverpool yatsinzwe
Jamie Vardy yatsinze igitego cya kabiri cya Leicester City nyuma yo gutwara umupira Alisson na Ozan Kabak bagonganye
Barnes yashimangiye intsinzi kuri King Power Stadium, atsinda igitego cya gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .